Қазақстанның Елшісі Нұрбах Рүстемов Румыния Премьер-министрінің Мемлекеттік кеңесшісі Юлиан Кифумен кездесті, деп хабарлайды DKNews.kz.
Келіссөздер барысында қазақстандық дипломат сұхбаттасты еліміздегі ішкі саяси және әлеуметтік-экономикалық жағдай, сондай-ақ Президент Қасым-Жомарт Тоқаевтың «Әділетті Қазақстанды» құруға бағытталған реформалары мен бастамаларын жүзеге асыру барысы туралы егжей-тегжейлі хабардар етті.
Сонымен қатар, тараптар энергетика, көлік және логистикалық ынтымақтастыққа ерекше назар аудара отырып, екіжақты қарым-қатынастардың жай-күйі мен оларды тереңдету перспективаларын талқылады.
Өз кезегінде Ю. Кифу Қазақстан екіжақты форматта да, ЕО-Қазақстан бағыты бойынша да Румынияның Орталық Азиядағы негізгі серіктесі екенін атап өтті.
Бұл ретте Мемлекеттік кеңесші Премьер-министр Кеңсесі Елшіліктің бастамаларын қолдайтынын және екі жаққа да тиімді, әсіресе сауда-экономикалық саладағы жобаларды жандандыруға көмектесуге дайын екеніне сендірді.
Сұхбаттастар сондай-ақ мәдени шаралардың жүзеге асырылуын, атап айтқанда, Румынияда қазақтың ұлы композиторы Құрманғазының және Қазақстанда румынның ұлы композиторы Джордж Энеску бюстілерінің ашылуын талқылады.
