Қазақстан Елшісі Болат Иманбаев Арменияның Еңбек және әлеуметтік мәселелер министрі Нарек Мкртчянмен кездесу өткізіп, оның барысында Қазақстан мен Армения арасындағы ынтымақтастықты дамыту мәселелері талқыланды, деп хабарлайды DKNews.kz.
Армян тарапы Қазақстанның Парламенті Мәжілісі мен мәслихаттарына сайлау қорытындыларымен, сондай-ақ елдегі ауқымды саяси және әлеуметтік-экономикалық өзгерістер туралы толық хабардар етілді. Арменияның Еңбек және әлеуметтік мәселелер министрі сайлаудың сәтті өтуімен құттықтап, Қазақстан басшылығының саясатын жоғары бағалады әрі еңбек және әлеуметтік салалардағы екіжақты және көпжақты қатынастарды одан әрі кеңейтуге дайындығын растады. Оның айтуынша, «Қазақстан халқы парламенттік сайлауға белсенді қатысып, өз таңдауын жасап, саяси жаңғыру мен демократиялық реформаларды қолдады».
Кездесу барысында Астана мен Ереван арасындағы түрлі салалардағы өзара тиімді ынтымақтастықты тереңдету перспективалары бойынша пікір алмасу өтті. 2023 жылға арналған екіжақты іс-шаралар кестесін талқылай отырып, тараптар биыл Ереванда өтетін экономикалық ынтымақтастық жөніндегі бірлескен үкіметаралық комиссияның 9-шы отырысын және қазақ-армян бизнес-форумын ұйымдастыру және өткізу мәселелеріне ерекше назар аударды.
