Қазақстанда Ян Непомнящий мен Дин Лижен арасындағы шахматтан әлемнің абсолютті чемпионы атағы үшін алғашқы матч басталды, деп хабарлайды DKNews.kz.
Осы айтулы дуэльді ашқан салтанатты рәсімде мәдениет және спорт министрі Асхат Оралов Халықаралық шахмат федерациясының (FIDE) Президенті Аркадий Дворковичпен бірге алғашқы символдық қадам жасады.
Естеріңізге сала кетейік, әлем біріншілігіне арналған матчтардың тарихы 1886 жылдан бастап есептеледі. 137 жылдық тарихта шахматтан 16 әлем чемпионы анықталды. Бүкіл әлем мұқият бақылап отырған бұл оқиға Қазақстандағы шахматты дамытудағы маңызды қадам болмақ. Қазірдің өзінде біздің елімізде спорттың осы түрін азаматтар арасында, әсіресе балалар мен жастар арасында дамыту және ілгерілету бойынша белсенді жұмыс жүргізілуде. 2022 жылы Қазақстан бойынша 7618 секцияда 250 мыңнан астам адам шахматпен жүйелі түрде айналысты, ал осы оқу жылының басынан бастап бұл пән 28 мыңға жуық балаға арналған 654 мектепте факультатив ретінде енгізілді.
Біз барлық шахмат әуесқойларын осы үлкен шахмат мерекесінің басталуымен құттықтаймыз және спортшыларға керемет ойын көрсетуді және, әрине, сәттілік тілейміз.
