Бүгін Қазақстан астанасында шахмат осы форматтағы бірегей турнирдің үшінші және соңғы күні өтті. Қазақстанның әйелдер құрамасы Әлемнің әйелдер құрамасымен сайысты. Алғашқы екі күн рапидтен өтсе, үшінші күні блицке арналды, деп хабарлайды DKNews.kz.
Тартысты бәсекеде Қазақстан құрамасы Әлем құрамасынан 73:55 есебімен жеңілді. Соған қарамастан жарыс барысында құрамамыз бірқатар жарқын жеңістерге қол жеткізді.
Турнирдің бірінші күні 18,5:13,5 есебімен әлем құрамасы үшін сәтті аяқталды. Екінші күні қазақстандық шахматшылар алғашқы үш раундта сенімді жеңістерге қол жеткізгенімен, соңғы ойындарда қонақтар басымдық танытып, 34,5:29,5 есебімен көшбасшылығын сақтап қалды.
Шиеленіскен сайыстың үшінші, шешуші күні блиц ойындарымен басталды. Мұнда раундқа 10 минут беріледі, жүрісті ойластыру уақыты шектеулі.
Ақтық сайыс Қазақстан командасы үшін ауыр басталды. Бірінші айналым қонақтардың еншісінде қалды. Екінші айналымды қазақстандықтар 5-3 есебімен өз пайдасына шешті. Онда Меруерт Камалиденова FIDE рейтингі бойынша ең мықты әйел гроссмейстер Хоу Ифаньды, Алуа Нұрманова Нұргүл Сәлімованы жеңді. Үшінші айналымда әлем құрамасы 6,5-1,5 есебімен алға шықты. Бірақ төртінші айналымда қазақстандықтар мықтырақ болып, оны 4,5:3,5 есебімен өз пайдасына бұра білді Бибісара Асаубаева Харика Дрюнавалиді жеңді. Меруерт Камалиденова Гүнай Мамедзадемен тең ойнаса, Жансая Әбдімәлік пен Хоу Ифань тең ойнады. Динара Саудақасова мен Нана Дзагнидзе де тең түсті.
Бесінші раундтың нәтижесі 5-3 есебімен әлем құрамасының пайдасына аяқталды.
Онда Бибісара Асаубаева Гүнай Мамедзадеден басым түсті, ал Нана Дзагнидзе мен Жансая Әбдімәлік ойыны тең аяқталды. Харика Дрюнавали – Меруерт Камалиденова жұбында да жеңімпаз анықталмады.
Алтыншы турда командалардың ұпай айырмашылығы азая бастады. Әлем құрамасы 4,5 жинаса, Қазақстан құрамасы 3,5 ұпайға шықты. Онда Меруерт Камалиденова Хоу Ифаньға қарсы, ал Бибісара Асаубаева Нана Дзагнидзеге қарсы матчтарда құрама қоржынын толықтырды.
Жетінші айналымда әлем құрамасы алға шықты. Есеп 6,5-1,5. Ең жарқын ойындар Бибісара Асубаева мен Хоу Ифань арасында өтті. Онда отандық шахматшы қытайлық қонақтан басым түсті. Ал Харика Дрюнавалли мен Жансая Әбдімәлік тең ойын көрсетті.
Сегізінші раунд жылдам өтіп, командалардың тең есебімен аяқталды – 4-4. Алуа Нұрманова Шри Б.Савитаны, Лия Құрманғалиева Жока Гаалды жеңді. Меруерт Камалиденова Гүнай Мамедзадені ұтса, Бибісара Асаубаева Харика Дрюнавалиден жеңісті жұлып алды.
Үш күнге созылған матчтың қорытындысы бойынша Қазақстан құрамасы 55 ұпай, Әлем құрамасы 73 ұпай жинады.
«Біз әлем құрамасынан жеңіліп қалдық, бірақ қыздарымыз тамаша ойын көрсетті. Олар планетаның ең үздік шахматшы әйелдеріне лайықты бәсекелес болып шықты. Матч қорытындысы біздің құраманың әлемдегі ең мықты командалардың бірі екенін растайды. Менің ойымша, бізге қонаққа келген мұндай жұлдызды құрамға қарсы осындай нәтиже көрсете алатын команда аз. Біз өз спортшыларымызды мақтан тұтамыз және олардың жетістіктері біздің күткенімізден де асып түсетініне сенеміз» Қазақстан шахмат федерациясының атқарушы директоры Гүлмира Дәулетова
Әйелдер арасындағы командалық матчтың жалпы жүлде қоры 50 000 долларды құрайды.
Әр құрама екі командадан тұрады. «А» командаларының құрамында төрт ересек спортшы бар. Ал «В» командалары – 14, 16, 18 және 20 жасқа дейінгі спортшылар.
Қазақстандық «А» тобында Бибісара Асаубаева, Жансая Әбдімәлік, Динара Сәдуақасова, Меруерт Камалиденова, «Б» тобында Ксения Балабаева, Алуа Нұрманова, Лия Құрманғалиева, Зарина Нұрғалиева болды.
Әлем құрамасының «А» командасына қытайлық Хоу Ифань, үнді шахматшысы Харика Дрюнавали, Әзірбайжан өкілі Гүнай Мамедзаде, грузин шахматшысы Нана Дзагнидзе кірді. «В» тобында Нұргүл Сәлімова (Болгария), Жока Гаал (Венгрия), Шри Б.Савита (Үндістан) және Афруза Хамдамова (Өзбекстан) бар.
Әйелдер арасындағы кездесу Ян Непомнящий мен Дин Лижэнь арасында өтіп жатқан классикалық шахматтан 2023 жылғы әлем чемпионаты аясында ұйымдастырылды. 9 сәуірде ашылған ойын Астанада, St. Regis Astana қонақүйінде өтуде. Чемпионат 1 мамырға дейін жалғасады.
Чемпионаттың бас серіктесі және ұйымдастырушысы - Freedom Holding Corp.
