Қазақстан Елшісі Дәурен Кәріпов Латвия Республикасының басшысы Линда Лиепиня бастаған ҚР Парламентімен ынтымақтастық жөніндегі Сейм тобының мүшелерімен кездесті, деп хабарлайды DKNews.kz.
Кездесуді ашу барысында Л. Лиепиня Қазақстан-Латвия қатынастарының деңгейін жоғары бағалай отырып, екі елдің парламентаралық өзара іс-қимылын, оның ішінде парламенттік делегациялардың өзара сапарларын ұйымдастыру арқылы жандандыруға мүдделілігін атады. Бұл ретте мемлекеттердің тыныс-тіршілігі салаларында өзгерістер жүргізу бойынша заң шығару тәжірибесімен алмасудың маңыздылығын ерекше атап өтті.
Өз кезегінде, Елші Латвия депутаттарын Қазақстан-Латвия қатынастарының қазіргі жағдайы мен даму перспективалары туралы егжей-тегжейлі хабардар етті, сондай-ақ оларды ҚР-дағы негізгі ішкі саяси және экономикалық жағдаймен таныстырды. Мемлекет басшысының өнеркәсіптік және экономикалық өзін-өзі қамтамасыз ету негізінде жаңа экономикалық модельге көшу, сондай-ақ халықтың әлеуметтік әл-ауқатын арттыру жөніндегі маңызды бастамаларына ерекше назар аударды.
Тараптар Қазақстан мен Латвия парламенттері арасындағы ынтымақтастықты кеңейту және тұтастай алғанда мемлекетаралық қатынастардың жағымды күн тәртібін ілгерілетуде жәрдемдесу жөніндегі практикалық қадамдар туралы уағдаласты.
