Облыс әкімінің бірінші орынбасары А.Бәрекенов Жаңаарқа ауданына жұмыс сапарымен барды. Сапарға Ұлытау облысы Ауыл шаруашылығы және жер қатынастары басқармасының басшысы К.Мутаев және «Аграрлық кредиттік корпорациясы» АҚ-ның (АКК) Ұлытау облысы бойынша филиалының директоры И.Бекмағамбетов қатысты, деп хабарлайды DKNews.kz.
Жұмыс сапарының мақсаты АӨК саласындағы қолданыстағы мемлекеттік қолдау шараларын түсіндіру.
Жаңаарқа ауданының ауыл шаруашылығы тауарөндірушілерімен кездескенге дейін А.Бәрекенов «Мирас» (Ақтүбек ауылдық округі) және «Берікбол» (Бидайық ауылдық округі) екі шаруа қожалығын аралады.
«Мирас» ШҚ негізгі қызметі асыл тұқымды Герефорд ірі қара мал өсіру, ал «Берікбол» ШҚ бұқашықтарды бордақылаумен айналысады. А.Бәрекенов «Берікбол» ШҚ-да бордақылауды ұйымдастырудың жақсы сапасын атап өтті және жобаны кеңейту мақсатында «АКК» филиалының директорына «Берікбол» ШҚ-на жеңілдетілген шарттармен несиелеуге жәрдем көрсетуді ұсынды.
Мал шаруашылығы нысандарын аралағаннан кейін Жаңаарқа ауданы әкімдігінің ғимаратында Жаңаарқа ауданының әкімі Ю.Бекқожиннің, ауылдық округ әкімдерінің қатысуымен фермерлік шаруашылықтармен кеңес өтті. Залда 100-ден астам шаруа және фермер қожалықтарының басшылары болды.
АКК қызметкерлері қолданыстағы «Кең дала», «Агробизнес» және «Іскер» кредиттік бағдарламалары бойынша ақпаратпен таныстырды. "ҚазАгроҚаржы» АҚ өкілі ауыл шаруашылығы техникасын сатып алу, атап айтқанда лизинг бойынша көрсетілетін қызметтер туралы айтып берді.
Фермерлер көптеген сұрақтар қойып, соның ішінде Жамбыл облысының мысалында шағын несие беру бойынша сұрақ қойып, оларға толық жауаптар алды.
Кездесу соңында А.Бәрекенов фермерлерге жем-шөп өндіру мәселелеріне ерекше назар аударуды және агробизнесті дамыту және кеңейту мақсатында мемлекеттік қолдаудың барлық құралдарын пайдалануды, сондай-ақ жер ресурстарын ұтымды пайдалануды ұсынды. Сонымен қатар, Ұлытау облысының ауыл шаруашылығы және жер қатынастары басқармасының басшысы К.Мутаевқа Жаңаарқа ауданының жұмыс істеп тұрған мал және астық егетін шаруашылықтарына ғылыми-практикалық сүйемелдеу көрсету үшін ғылыми ұйымдардың қызметкерлерін тарту жөніндегі жұмысты күшейтуді тапсырды.
Сапар соңында, Ұлытау облысының 2026 жылға дейінгі Кешенді даму жоспары аясында инвестициялық жобаларының бірі «ULY DALA CO» ЖШС-нің «Мал сою цехы, салқындатылатын қоймалары, кейіннен етті терең өңдейтін тоңазытқыш камералары бар 10 мың бас малға арналған мал шаруашылығы кешенін құру» жобасына АКК филиалының қызметкерлерімен бірге барды.
Жобаны іске асыру мақсатында аталған ЖШС суару техникасы мен жабдықтарын пайдалана отырып, жемшөп дақылдарын өсіру жөніндегі іс-шараны жүзеге асырады. Мәселен, 1000 гектар алқапта жемшөп жүгерісін өсіру жоспарлануда. Осы мақсатта облыстық бюджет қаражатынан 329,6 млн. теңге сомаға «Шалғия» су қоймасына бөгет салынды, онда көктемгі кезеңде 3,5 млн.м3 су көлемінде су жинақталады деп күтілуде.
АКК филиалының директорына мал сатып алу, бордақылау және суару жөніндегі жобаны одан әрі дамыту үшін осы ЖШС-ге кредит беру мәселесін пысықтау жөнінде тиісті тапсырма берілді.
