4 ақпанда Петропавлда сағат 20.10 шамасында Ұлттық ұланның 6637 әскери бөлімінің әскери қызметшілері патрульдік-постылық қызмет өткеру кезінде Ш. Уәлиханов көшесінде тұрғын үйдің үшінші қабатының терезесінен секірмек болған әйелді байқады, деп хабарлайды DKNews.kz.
Ұландықтар аумақты дереу қоршап алып, азаматшаны құтқару үшін жедел шаралар қабылдады.
- Біз көшеде қызметте жүріп, тұрғын үйдің 3 қабатынан секірмек болған азаматшаның іс-әрекеті туралы хабардар болдық. Мен бұл туралы дереу әскери жасақ кезекшісіне хабарладым. 102-ге қоңырау шалып, уақытты созу мақсатында оны секіру туралы ойынан айнытуға тырысып, келісімге келдік. Осы кезде жұбайы оны пәтерге кіргізіп үлгерді, - деді патрульдік топтың бастығы қатардағы жауынгер Иван Шалавин.
Оқиға барысында азамат зардап шеккен жоқ, салдары мен себептері анықталуда.
