Қарағанды облысының мәдениет министрі деп атап кеткен, аймақтың ең танымал және құрметті әйелдерінің бірі Рымбала Омарбекованың мерейтойы, деп хабарлайды DKNews.kz.
Облыс әкімдігінде ҚР еңбек сіңірген қайраткері, Қарқаралы ауданының, Қарағанды қаласының және Қарағанды облысының Құрметті азаматын 80 жылдығымен құттықтады.
Рымбала Омарбекованың көптеген марапаттары мен алғыс хаттары бар. Ол мемлекеттік қызметке 40 жылдан астам уақыт өмірін арнаған. Оның ішінде 19 жыл Облыстық мәдениет басқармасын басқарды.
Рымбала Омарбекова өңірдің мәдени және әлеуметтік саласын дамытуға көп күш пен уақыт жұмсаған, деп атап өтті Қарағанды облысының әкімі Ермағанбет Бөлекпаев.
– Сіз біздің өлкеміз үшін, бүкіл республика үшін көп еңбек жасадыңыз. Сіздің арқаңызда сақтап қалған және одан әрі дамыған мәдениет нысандарын тізімдеу ұзақ уақытқа созылуы мүмкін. Олардың қатарында Долинкадағы саяси қуғын-сүргін құрбандарының мұражайы, Сәкен Сейфуллин атындағы театр және Қарағанды кеншілер мәдениет сарайы бар. Әріптестеріңіздің атынан, бүкіл облыс тұрғындарының атынан ерен еңбегіңіз үшін алғыс айтамын. Мерейтойыңызбен шын жүректен құттықтаймын, отбасыңызға зор денсаулық пен амандық тілеймін, – деді өңір басшысы.
Қазақстан тәуелсіздігінің қалыптасуы кезінде Рымбала Омарбекова ауылдардағы кітапханалар мен клубтарды сақтап, онда жаңа жұмыс әдістерін енгізе алды. Оның басшылығымен Республикада алғаш рет ауылдық кітапханалар қызметкерлерінің форумы, содан кейін ауыл мәдениет қызметкерлерінің форумы өткізілді. Ол Тәттімбет атындағы Қазақ халық аспаптар оркестрін құрудың, Теміртауда балалар мен жасөспірімдерге арналған театр ашудың, жыл сайынғы облыстық фестивальдар өткізудің бастамашысы. Рымбала Омарбекова қазақстандық кино өнерін насихаттаумен айналысып, өңірдегі жалғыз мемлекеттік кинотеатрды басқарды.
Оның жұмысындағы ең басты жетістіктері - қазақстандықтарды ағартуға, олардың мәдениетін арттыруға және Отанға деген сүйіспеншілікті оятуға деген ұмтылысы, деп атап өтті әріптестер.
– Сіздің тәрбиеленушілеріңіз еліміздің түрлі аймақтарында абыроймен жұмыс істеп жатыр. Сіздің барлық жұмысыңыз бен өміріңіз – өскелең ұрпақ үшін үлгі, – дейді Е. А. Бөкетов атындағы Қарағанды университетінің ректоры Нұрлан Дулатбеков. – Мәдениет жолындағы қиын жұмысыңызды бағалаған әріптестеріңіз Сізді өнердің Ұлпаны, Арқа маралы деп атады. Бұл сіздің еңбегіңізді жоғары бағалау. Сіз бүгінгі күнге дейін ұлттық өнерді, мәдени мұраны және рухани құндылықтарды дәріптейсіз, шығармашылық адамдарды қолдайсыз. Бұл керемет!
Мерейтой иесі баршаға айтылған жылы сөздері үшін алғысын білдіріп, өңірге өркендеу, өнер мен мәдениет саласында жаңа қызықты идеялар тіледі.
