Сарапшылар мемлекет басшысының сұхбатындағы негізгі тезистерді талқылады, деп хабарлайды DKNews.kz.
Астанада ҚР-ның Президенті Қасым-Жомарт Тоқаевтың 2024 жылғы 3 қаңтардағы «Egemen Qazaqstan» газетіне берген сұхбатына арналған «ХХІ ғасырдағы Әділетті Қазақстан: жаңа жетістіктер мен даму перспективалары» атты дөңгелек үстел форматында сараптамалық талқылау өтті. Іс-шараны ҚР Ғылым және жоғары білім министрлігінің Мемлекет тарихы институты және Астана қаласы әкімдігі ұйымдастырды.
ҚР Парламенті Мәжілісінің депутаты Самат Нұртаза құттықтау сөз сөйледі. Мемлекет тарихы институтының директоры, PhD Нұрбек Пұсырманов, Жошы ұлысын зерттеу ғылыми инстиуты директорының міндетін атқарушы Жақсылық Сәбитов баяндама жасады.
Ойталқыда ҚР Президенті жанындағы ҚСЗИ, Қазақстандық қоғамдық даму институты, Қолданбалы этносаяси зерттеулер институты, Еуразиялық интеграция институты, Мемлекет тарихы институты сияқты отандық талдау құрылымдарының қызметкерлері, сондай-ақ азаматтық қоғам өкілдері қатысты.
Сарапшылар өз тезистерінде Мемлекет басшысының сұхбатындағы негізгі месседждер халық арасында өзекті екенін және ағымдағы жаңғырту күн тәртібін толық көрсететінін атап өтті. Бұл ретте, Еуразиялық интеграция институтының ғылыми-теориялық талдау және әдіснамалық қамтамасыз ету департаментінің басшысы, т.ғ. к. Арман Ешмұратов Әділетті Қазақстанның жаңа дискурсында сапалы сараптамалық толықтыру қажеттігін ерекше атап өтті.
ҚР Президенті жанындағы Қазақстандық стратегиялық зерттеулер институтының (ҚСЗИ) Стратегиялық талдау бөлімінің басшысы Ермек Тоқтаров саяси институттарды одан әрі нығайтуға және халықтың елдің тұрақты дамуына белсенді саяси қатысуының маңыздылығына назар аударды.
Өз сөзінде Қолданбалы этносаяси зерттеулер институты орталығының директоры Аяулым Сағынбаева Қазақстанның демографиялық дамуын талдай отырып, адами капитал сапасының өзектілігіне назар аударды, бұл Қазақстан Республикасы Президентінің сұхбатында көрініс тапты.
Қазақстандық қоғамдық дамудың институты Басқарма төрағасының орынбасары Олжас Бейсенбаев социологиялық өлшемдерде тіркелген президенттік институтқа деген қоғамдық көңіл-күйдің оң динамикасын атап өтті.
Дөңгелек үстел аясында Жошы ұлысының 800 жылдығына орай «Қазақ хандығы тарихындағы Шибандар (Шейбандар, Шайбақтар) Әулеті (Ібір-сібір, Дешті-қыпшақ, Мәуереннахр аймақтарында)» зерттеу тобының ұжымдық монографиясының салтанатты тұсаукесері өтті. Монографияда жоба аясында зерттеу тақырыбына қатысты анықталған және тарих ғылымында бұрын қолданылмаған жаңа еңбектер, мұрағаттық құжаттар, карталар мен иллюстрациялар қамтылған.
Іс-шараға ҚР Парламентінің өкілдері, қоғам және мемлекет қайраткерлері, ғылыми-сарапшылық ұйым қызметкерлері, азаматтық қоғам өкілдері, Астана қаласындағы ЖОО ғалымдары және БАҚ өкілдері қатысты.
