Алматыда өткен ХХ Халықаралық Жәутіков олимпиадасында әлемнің 16 елінен 700-ге жуық оқушы нақты ғылымдарды білуде бақ сынасты, деп хабарлайды DKNews.kz.
Үш қарағандылық математика, физика және информатика білгірлері үшінші орынға ие болды.
Биылғы жылы Қарағанды облысының намысын "Озат" мектеп-лицейінің, Н. Нұрмақов атындағы ММЛИ, "Мұрагер" ММЛИ, Қ. Сәтбаев атындағы гимназия және Қарағанды № 2 лицейінің оқушылары қорғады. Нәтижесінде №1 БИЛ-дің оныншы сынып оқушылары Әліби Ақберді (физика) және Жанарыс Теңдіков (математика),
сондай-ақ Н. Нұрмақов атындағы ММЛИ оныншы сынып оқушысы Әлішер Қазтаев (информатика) үшінші орынға ие болды.
– Жанарыс Теңдіков 7-сыныптан бастап математикамен айналысады. Өткен жылы ол республикалық олимпиадада бірінші орынды иеленді. Биылғы жылы геометрия бойынша халықаралық олимпиадада 10th Iranian Geometry Olympiad үшінші болды және Жәутіков олимпиадасында да үшінші орынға ие болды. Жанарыс Қазақстан құрамасының резервінде, – деді № 1 БИЛ математика пәнінің мұғалімі Серікжан Қалданов.
Халықаралық қазылар алқасы жеті елдің – Қазақстан, Ресей, Армения, Беларусь, Оңтүстік Корея, Қытай және АҚШ өкілдерінен тұрды.
Олимпиада жеңімпаздары медальдармен, дипломдармен және бағалы сыйлықтармен марапатталды.
Естеріңізге сала кетейік, Халықаралық Жәутіков олимпиадасы 2005 жылдан бастап ҚР Білім Министрлігінің қолдауымен "Дарын" РҒПО және Алматы әкімдігінің қолдауымен өтуде. Ұйымдастырушы-Алматыдағы Республикалық физика-математика мектебі.
