Қарағандыда жаңа облыстық балалар клиникалық ауруханасы базасындағы "Қамқорлық" ерте араласу орталығы өткен жылдың қыркүйек айында жұмыс істей бастады, деп хабарлайды DKNews.kz.
Осы уақыт ішінде 385 бала тегін көмек алды.
Алғашқы қадамдарын 52 сәби жасады, ал 29 бала алғашқы сөздерін айтты.
Орталықта церебральды сал ауруы, аутизм және дамудың кешеуілдеуі бар балалар абилитация мен оңалтудан өтеді.
Тәулік бойы және күндізгі стационарлар бар.
– Жаңа ғимаратқа көшкенге дейін бізде оңалту орталығы болған жоқ, – дейді ОБКА медициналық бөлімі директорының орынбасары Нина Деркач. – Мұнда біз осындай маңызды және қажетті бағытты аша алдық. Ерте араласу орталығында 3 айдан 3 жасқа дейінгі балалар көмек алады. Оңалту орталығында – 18 жасқа дейін. Тұз шахтасы, шунгит бөлмесі, екі жақсы жабдықталған ЕДШ кабинеті жұмыс істейді. Кішкентайлар үшін "Посейдон" иммерсиялық ваннасы бар, бұл балалар өздерінің эмоционалды қабілеттерін көрсете алатын сенсорлық кабинет.
Орталықта үйлесімді мамандар тобы жұмыс істейді. Бұл невропатологтар, реабилитологтар, жаттығу терапиясының нұсқаушылары, психологтар, логопедтер, кәсіби терапевттер. Олардың барлығы қайта даярлау және біліктілікті арттыру курстарынан өткен.
Жыл сайын ерте араласу орталығы 600-ге дейін кішкентай пациенттерді қабылдайды.
Орталық "Самұрық-Қазына" және "Қазақстан халқына" қорларының қолдауымен жарақтандырылды. Мұнда АҚШ, Германия, Ұлыбритания, Ресей және Қазақстан өндірген ең заманауи медициналық оңалту және диагностикалық жабдықтар бар.
– "Самұрық-Қазына" қоры 2020 жылдан бастап оңалту орталықтарының ашылуына қаржылай қолдау көрсетіп келеді. Үш жыл ішінде елімізде инклюзияны дамыту шеңберінде қор 15 оңалту орталығын, 14 ерте араласу орталығын және аутизмі бар балаларға арналған 5 орталықты іске қосты. Бүгін Қарағандыда 35-ші оңалту орталығын іске қостық. Бұл бастама алдағы уақытта да жалғасады, – деп атап өтті "Самұрық – Қазына"АҚ компаниялар тобының бірыңғай қайырымдылық операторы-Samruk-Kazyna Trust әлеуметтік жобаларды дамыту қорының бас директоры Альфия Адиева.
Елена Чобану қызымен бірге орталыққа екінші рет ем алуға келген. Баласы церебральды сал ауруына шалдыққан. Отбасы Осакаровкада тұрады.
– Бұған дейін біз Алматы мен Астанадағы орталықтарға бардық. Қарағандыдағы орталық олардан кем емес. Заманауи жабдықтар, білімді мамандар. Менің қызым сияқты балалар үшін көптеген мүмкіндік бар. Алғашқы емнен кейін ол басын ұстай бастады, көп затты түсіне бастады. Қарағандыда ерекше балаларға арналған осындай жақсы орталық пайда болғаны өте керемет, – дейді Елена Чобану.
