ҚР Денсаулық сақтау министрі Ажар Ғинияттың бастауымен қазақстандық делегация Женева қаласында Дүниежүзілік Денсаулық сақтау ассамблеясының 75-ші сессиясының жұмысына қатысуда, деп хабарлайды Деловой Қазақстан.
Сессия барысында қазақстандық делегация ДДҰ бас директорының орынбасары Жужанна Якабпен және ДДҰ-ның МСАК жөніндегі арнайы бағдарламасының директоры Сурайя Далильмен кездесті. Кездесудің нәтижесі ұлттық және халықаралық деңгейлерде мүдделерді ілгерілетуге жәрдемдесу жөніндегі келісім болды.
Қазақстанның денсаулық сақтау министрі Үндістанның Денсаулық сақтау министрімен және Ресей Федерациясының Денсаулық сақтау вице-министрімен денсаулық сақтау саласындағы көпжақты ынтымақтастықты одан әрі талқылау бойынша кездесу өткізді.
Сондай - ақ, ҚР ДСМ басшысы Индонезия, Жапония, Грузия және басқа да Денсаулық сақтау министрлерімен кездесті. Қорытындысы бойынша 2018 жылы Қазақстанда 150-ден астам ел қабылдаған МСАК жөніндегі Астана декларациясын бірлесіп ілгерілету және денсаулық сақтау саласындағы көпжақты ынтымақтастықты жандандыру бойынша уағдаластыққа қол жеткізілді.
Ведомство басшысы Орталық Азия елдерінің денсаулық сақтау министрлерінің Еуропалық ДДҰ-ның өңірлік директоры Ханс Клугемен кездесуіне қатысты, онда қатысушыларды дипломатиялық қатынастардың 30 жылдық мерейтойымен құттықтап, елдеріміздегі тұрақты даму мақсаттарына қол жеткізу бойынша күш-жігерді біріктірудің маңыздылығын атап өтті. А.Ғиният МСАК-ты қоса алғанда, денсаулық сақтау жүйесіне міндетті түрде инвестициялай отырып, 2025 жылға дейін Орталық Азияда денсаулық пен амандықты қолдау жөніндегі Жол картасын әзірлеу қажеттігін қолдады.
ДДҰ темекіге қарсы күрес жөніндегі негіздемелік конвенциясы Хатшылығының Басшысы Адриана Бланко Маркисомен кездесу барысында министр шылым шегудің алдын алу бойынша жүргізіліп жатқан жұмыстар туралы хабардар етті және оны ҚР-дағы темекі шегумен күрес жөніндегі одан арғы стратегияны талқылау мақсатында Қазақстанға шақырды.
Сонымен қатар, ҚР Денсаулық сақтау министрлігінің басшысы "Women in Global Health" директоры Магда Робаломен Қазақстанның қоғам өмірінің барлық салаларында гендерлік теңдікті қамтамасыз ету бойынша күш-жігерінің маңыздылығын талқылады.
