2020 жылы кемеңгер ойшыл, ұлы ғұлама Әбу Насыр әл-Фарабидің туылғанына 1150 жыл толуына байланысты мерейтойдың ашылу салтанаты Алматыдағы Қазақ ұлттық университетінің қабырғасында өтті. Ресми рәсімге қала әкімі Бақытжан Сағынтаев қатысып, сөз сөйледі.
Алматы қаласының әкімі Бақытжан Сағынтаев салтанатты шараның әлемдік ғылым мен өркениеттің дамуына баға жетпес үлес қосқан орта ғасыр дәуіріндегі ұлы ойшыл, энциклопедист және философ Әбу Насыр әл-Фарабидің рухани мұрасын құрметтеу екенін атап өтті.
Бүгінгі күні жаһандану барысында ұлттың ең басты құндылықтары мен тарихи тұлғаларын жаңа қырынан танып, оларды жұртшылыққа кеңінен насихаттау аса маңызды.Бұл үдеріс тек рухани кемелдену арқылы, әл-Фараби, Яссауи, Абай сынды заманынан озып туған данышпандардың еңбектерін жаңаша бағалап, солар айқындап берген даңғыл жолмен жүру арқылы ғана жүзеге асады.
«Бүгінгі шараның басты себепкері – ортағасырлық ғұлама ойшыл, энциклопедист-ғалым, философ Әбу Насыр әл-Фарабидің рухани мұрасы әлемдік ғылым мен өркениеттің дамуына өлшеусіз үлес қосқан білімнің сарқылмайтын қайнар бұлағы. Елдігіміз бен интеллектуалдық әлеуетімізді әлем жұртшылығына паш ететін ғұламаның дәл қазақ топырағынан шыққаны біздер үшін зор мақтаныш. «Екінші ұстаздың» философиялық, логикалық, метафизикалық, әлеуметтік, жаратылыстану ғылым салалары бойынша әлемдік ғылымға қосқан үлесінің теңдесі жоқ», - деді Б. Сағынтаев.