Әл-Фараби атындағы ҚазҰУ ғалымдары ҚБТУ және Назарбаев университетіндегі әріптестерімен бірлесе отырып, иондаушы сәулеленудің әсерінен көміртекті наноқабырғалар негізіндегі фотодиодтардың бірегей қабілеттерін анықтады, деп хабарлайды DKNews.kz.
Зерттеулер ҚР Ғылым және жоғары білім министрлігі Ғылым комитетінің гранттық қаржыландыру конкурсы және университеттер арасындағы ынтымақтастық жобалары аясында жүргізілді.
Әл-Фараби атындағы ҚазҰУ-дың ғалымдар тобын ҚР ҰҒА академигі Тілекқабыл Рамазанов, ҚБТУ-дан профессор Маратбек Ғабдуллин және Назарбаев университетінен профессорлар Виктор Брус пен Асхат Жұмабеков басқарды.
Зерттеу барысында көміртекті наноқұрылымдар мен кадмий-мырыш теллуридіне негізделген гетеротүсірілімнің радиациялық индукцияланған және өзін-өзі бейімдейтін ерекшеліктерімен байланысты серпінді нәтижелер алынды.
Зерттеу нәтижелері 11 импакт-факторы бар беделді Carbon журналында жарияланған. Бұл басылым аталған ғылым саласындағы журналдардың үздік 1 пайызына кіреді. Ұсынылған құрылғыларды одан әрі зерттеу жаңа ғарыш технологияларын әзірлеу мақсатында Халықаралық ғарыш станциясының (ХҒС) бортындағы ғарыш кеңістігі факторларының ықпалы жағдайында жүргізу жоспарлануда.
ҚазҰУ ғалымдарының ғарышкерлер Талғат Мұсабаев пен Айдын Айымбетовтің ғарышқа ұшуы кезінде ХҒС бортында «Плазмалық кулондық кристалл» бағдарламасы бойынша ғылыми эксперименттер қоюда мол тәжірибесі бар екенін атап өткен жөн.
Зерттеу жұмысының нәтижелері туралы толық мәлімет төмендегі сілтемеде.
