Қазақстанда тау-кен секторына арналған конвейерлік жабдықтар өндірісін ашу бойынша инвестициялық жоба жүзеге асырылады, деп хабарлайды DKnews.kz.
Қазақстанның Нидерландтағы Елшісі Қайрат Әбдірахманов «REPA Conveyor Equipment» компаниясының бас директоры Ричард ван дер Лаанмен кездесіп, екіжақты инвестициялық жобаны іске асыру мәселелерін талқылады. Кездесуде Қазақстанда тау-кен секторына арналған конвейер жабдықтарын шығаратын өндірісті ашу мәселесі қозғалды.
Тараптар Қазақстан мен Нидерланд арасындағы өнеркәсіптік сектордағы ынтымақтастықты нығайтудың маңыздылығын атап өтті. Р. ван дер Лаан компанияның Қазақстандағы қызметін кеңейтуге мүдделі екенін айтып, елдің өнеркәсіптік әлеуетін және стратегиялық орналасуын жоғары бағалады. Қ.Әбдірахманов Қазақстан Елшілігі жобаны іске асыруға толық қолдау көрсететінін мәлімдеді. Сонымен қатар жоба «Kazakh Invest» АҚ қолдауымен жүзеге асырылып, «REPA Conveyor Equipment» компаниясымен тығыз жұмыс жүргізіледі.
Бұл бастама Қазақстан мен Нидерланд арасындағы экономикалық ынтымақтастықты дамытудағы маңызды қадам болып табылады және екіжақты қатынастарды әртараптандыру қажеттігін көрсетеді. Конвейер жабдықтарын өндіру сияқты озық салаларда серіктестік орнату арқылы екі ел де өзара өсу мен ұзақ мерзімді ынтымақтастық үшін неғұрлым серпінді және берік негіздер құруға үлес қосуда.
