«GGGI»-мен жасыл ынтымақтастық қарқынды түрде дамуда, деп хабарлайды DKnews.kz.
БҰҰ-ның 8-ші Бас хатшысы және Жаһандық жасыл өсу институтының (GGGI) Төрағасы Пан Ги Мунның төрағалығымен «GGGI»-дің 13-ші Ассамблеясы мен «GGGI» Кеңесінің 17-ші бірлескен сессиясы өтті. Іс-шараға Қазақстан өкілдерімен бірге, ұйымға мүше мемлекеттердің делегациялары қатысты.
Қазақстанның Кореядағы Елшісі Нұрғали Арыстанов делегация жетекшісі ретінде сөз сөйлей отырып, Қазақстан мен «GGGI» арасындағы жасыл экономика саласындағы ынтымақтастықтың табысты дамуын атап өтті. Қазақстандық дипломат жасыл экономиканың мәселелері екіжақты қатынастарда барған сайын маңызды бола түскенін айтты. Ол қатысушыларға жасыл технологияларды қолдану мәселесі 2024 жылғы маусымда Корея Президенті Юн Сок Ёльдің Қазақстанға сапары және 2024 жылғы қазанда Корея Ұлттық Ассамблеясының Спикері У Вон Шиктің сапары кезінде және басқа екіжақты кездесулер барысында талқыланғанын хабарлады.
Н. Арыстанов Қазақстан 2023 жылғы ақпанда 2060 жылға дейін көміртекті бейтараптыққа жету Стратегиясын бекіткенін мәлімдеді. Құқықтық квоталар бойынша сауда жүйесі 43% шығарындыларды қамтиды, бұл 1990 жылғы деңгеймен салыстырғанда шығарындыларды 13% қысқартуға мүмкіндік берді. 2025 жылдан бастап кәсіпорындарда жаңа технологияларды енгізу жоспарланып отыр, ал Жасыл таксономия экологиялық жобаларды бағалау үшін қолданылатын болады.
Сонымен қатар, Елші екі мемлекет арасында жасыл экономика саласында нақты жобалар жүзеге асырылып жатқанын, соның ішінде корей компанияларымен бірге қалдықтарды қайта өңдеу зауыттарын салу және энергетикалық нысандарды модернизациялау бойынша ынтымақтастықты атап өтті.
2022 жылғы желтоқсаннан бастап Қазақстан «GGGI» мүшесі болып табылады. «GGGI» аясында метан жағуды оңтайландыру жобасы (Kazakhstan Methane Gas Flaring Optimization Project) іске асырылуда. Сондай-ақ, Арал теңізінің кеуіп қалған түбінде сексеуіл ағаштарын отырғызу жобасы – Орман секторындағы ынтымақтастық жөніндегі Азия ұйымымен (AFoCO) бірлесіп жүзеге асырылған табысты ынтымақтастық мысалы.
