Қазақстанның АҚШ-тағы Елшісі Ержан Ашықбаев АҚШ-тың Сауда өкілі, кабинет мүшесі Кэтрин Таймен кездесу өткізді, деп хабарлайды DKnews.kz.
Кездесу барысында екіжақты сауда-экономикалық ынтымақтастықтың өзекті мәселелері, аймақтық интеграция және болашақта қатынастарды дамыту перспективалары талқыланды.
Ержан Ашықбаев Қазақстан мен АҚШ арасындағы кеңейтілген стратегиялық серіктестіктің қарқынды дамуын атап өтіп, Қазақстан Республикасының өзара мүдделер негізінде сындарлы әріптестікті одан әрі нығайтуға дайын екенін растады. Елші Қазақстанның шетелдік инвесторлар үшін қолайлы жағдай жасауға деген ұмтылысын және шетелдік инвестицияларды қорғау мен реттеудің заманауи әрі ашық тетіктерін қамтамасыз ететін «Астана» Халықаралық қаржы орталығының рөлін ерекше атап өтті.
Кэтрин Тай Қазақстанның халықаралық сауданы дамытуға қосқан үлесін және жаһандық экономикаға интеграцияға ұмтылысын жоғары бағалады. Ол Қазақстанмен ынтымақтастықты жалғастырудың маңыздылығын атап өтіп, екіжақты өзара іс-қимылдың одан әрі даму үшін айтарлықтай әлеуетке ие екенін жеткізді.
Кездесуде екіжақты экономикалық ынтымақтастық күн тәртібіндегі басым бағыттардың бірі болып қала беретін Джексон-Вэник түзетуін жою мәселелеріне ерекше назар аударылды.
Сонымен қатар, кездесу барысында сауда саласындағы келісім-шарттық-құқықтық базаны жаңарту перспективалары және әйелдер кәсіпкерлігін қолдауға, жаңа мүмкіндіктерді дамытуға бағытталған бастамаларды жүзеге асыру мәселелері талқыланды.
Тараптар Кэтрин Тайдың Астанаға сапарын және Қазақстанда өткен АҚШ пен Орталық Азия арасындағы Сауда және инвестиция туралы негіздемелік келісім (TIFA) Кеңесінің отырысын жоғары бағалады. Олардың пікірінше, TIFA сауда рәсімдерін жетілдіру, нарыққа қолжетімділікті кеңейту және зияткерлік меншік құқығын қорғау сияқты практикалық мәселелерді шешу және жүйелі өзара іс-қимылды нығайту үшін тиімді платформа болып табылады.
