Д. Серікбаев атындағы Шығыс Қазақстан техникалық университетінде «Лу Бань шеберханасының» ашылғанына бір жыл толуына орай дөңгелек үстел өтті, деп хабарлайды DKnews.kz.
Д. Серікбаев атындағы Шығыс Қазақстан техникалық университетінде бірегей халықаралық білім беру жобасы – «Лу Бань шеберханасының» жүзеге асырыла бастағанына бір жыл толуына орай дөңгелек үстел ұйымдастырылды. Дәл бір жыл бұрын басталған бұл жоба өңір мен елдің өнеркәсіп саласына жоғары білікті инженерлік-техникалық мамандарды даярлауға бағытталған.
КЕАҚ «Д. Серікбаев атындағы Шығыс Қазақстан техникалық университеті»
Кадрларды даярлаудағы инновациялық тәсіл
«Лу Бань шеберханасы» студенттерді озық технологиялармен, заманауи зертханалармен және өзекті білім беру бағдарламаларымен қамтамасыз етеді. Нарықтың қарқынды дамып келе жатқан талаптарына сай іс-тәжірибелік дағдыларды жетілдіруге ерекше көңіл бөлінген. Өткен бір жыл ішінде шеберханаға тікелей қатысы бар білім беру бағдарламалары бойынша оқитын студенттер саны екі есеге көбейді. Бұл инженерлік-техникалық мамандықтарға деген қызығушылықтың артып келе жатқанын көрсетеді. Сонымен қатар, индустрия 4.0 талаптарына толықтай жауап бере алатын мамандарды даярлауға бағытталған жаңа инновациялық білім беру бағдарламасы әзірленіп, енгізілді.
КЕАҚ «Д. Серікбаев атындағы Шығыс Қазақстан техникалық университеті»
Халықаралық ынтымақтастық және өнеркәсіптік қолдау
Дөңгелек үстел барысында Қытай Халық Республикасының Қазақстандағы Бас консулы Цзян Вэй сөз сөйледі, ол екіжақты серіктестіктің маңыздылығын атап өтті:
Біз өзара тиімді ынтымақтастығымызға өте қуаныштымыз. Келіссөздердің алғашқы кезеңінен бастап жобаны ресми іске қосқанға дейін ШҚТУ тарапынан жоғары деңгейдегі белсенділікті байқадық және алдағы уақытта да байланысты нығайта түсеміз деп сенеміз. Қытай Халық Республикасының Қазақстандағы Бас консулы Цзян Вэй
КЕАҚ «Д. Серікбаев атындағы Шығыс Қазақстан техникалық университеті»
Талқылау барысында шеберхана базасында ғылыми-зерттеу қызметін дамытуға, сондай-ақ халықаралық серіктестер санын кеңейтуге айрықша назар аударылды. Жоспар бойынша Allur, QazTehna және Astana Motors сынды ірі автомобиль өндірісімен айналысатын кәсіпорындарды білім беру үдерісіне белсенді тарту көзделуде. Бұл компаниялар студенттерге тек практикалық тағылымдамалар ғана емес, сонымен қатар нақты өндірістік жобаларға қатысу, келешекте жұмысқа орналасу мүмкіндіктерін ұсынады деп күтілуде.
КЕАҚ «Д. Серікбаев атындағы Шығыс Қазақстан техникалық университеті»
Болашақ және одан әрі даму
ШҚТУ-дің халықаралық ынтымақтастық жөніндегі проректоры Арайлы Сәрсембаева «Лу Бань шеберханасының» Қазақстандағы инженерлік білім беруді дамытудағы маңызын атап өтті:
Бұл шеберхана – университетіміз үшін жаңа қадам ғана емес, сонымен бірге уақыттың талаптарына жауап бере алатын жаңа буын кадрларын қалыптастыруға қосқан үлес. Біз бұл жоба жаһандық деңгейде бәсекеге қабілетті жоғары білікті мамандарды даярлайтын орталыққа айналады деп сенеміз.
КЕАҚ «Д. Серікбаев атындағы Шығыс Қазақстан техникалық университеті»
Бір жылдық жұмыс барысында «Лу Бань шеберханасы» болашаққа бағдарланған кадрларды даярлауда тиімді платформа ретінде өзін танытты. Алдағы уақытта ол Қазақстанда инженерлік-технологиялық бағыттарды дамытудың негізгі қозғаушы күшіне айналып, елдің халықаралық аренадағы беделін арттыра түсіп, тұрақты экономикалық өсудің берік іргетасын қалап беруге әлеуетті.
