Қазақстанның Жапониядағы Елшісі Ерлан Баударбек-Қожатаев Атом және сутегі бомбаларынан зардап шеккендер ұйымдары жапондық конфедерациясының (Нихон Хиданкё) тең төрағасы Тэруми Танака бастаған делегациямен кездесу өткізді, деп хабарлайды DKnews.kz.
Елші «Нихон Хиданкёні» жақында Нобель бейбітшілік сыйлығымен марапатталуымен құттықтап, бұл конфедерацияның ядролық қаруды жою және халықаралық қауіпсіздікті нығайтуға қосқан үлесін мойындау екенін атап өтті.
«Нихон Хиданкё» өкілдері «хибакуся» термині (ядролық жарылыс салдарынан зардап шеккендер) әлемде танымал болып, ядролық сынақтардан зардап шеккен барлық адамдарды, соның ішінде Семей полигоны аймағында тұрған адамдарды біріктіріп, «жаһандық хибакуся» ұғымына айналғанын айтты.
Кездесу барысында 2025 жылғы наурызда Нью-Йорктегі БҰҰ штаб-пәтерінде өтетін Ядролық қаруға тыйым салу туралы шартқа (ЯҚТСШ) қатысушы мемлекеттердің 3-ші кездесуінде Қазақстанның төрағалығына ерекше назар аударылды.
Осыған орай Т.Танака іс-шараға «Нихон Хиданкё» делегациясын жіберетінін және қазақстандық төрағалыққа қолдау білдіретінін хабарлады. Жапонияның билеуші коалициясының өкілдері болып табылатын парламент мүшелері алдағы кездесуге қатысуға жоспарлап отырғаны аталып өтті.
Жапон қоғамдық ұйымының өкілдері ядролық қарусыздану үшін жаһандық қозғалыстағы Қазақстанның күш-жігерін жоғары бағалады. Кездесу қорытындысы бойынша Е.Баударбек-Қожатаев пен Т.Танака ядролық қарудан азат әлем құруға бағытталған бастамаларды іске асыру үшін тығыз өзара іс-қимыл жасауға келісті.
«Нихон Хиданкё» конфедерациясы Хиросима мен Нагасакиді ядролық бомбалаудан аман қалған адамдармен (хибакуся) зардап шеккендерге көмек көрсету мен ядролық қарудан бас тарту идеяларын насихаттау мақсатында 1956 жылы құрылды. Конфедерация ЯҚТСШ-ны әмбебаптандыруды белсенді түрде насихаттайды және ядролық қарусыз әлем құруды жақтайды. 2024 жылы ядролық қарусыз әлемге қол жеткізгені үшін Нобель сыйлығымен марапатталды.
