АҚШ-тың бұрынғы елшісі Дэниэл Розенблюмнің көзімен Қазақстанның туристік әлеуеті: әсерлер, мүмкіндіктер және перспективалар, деп хабарлайды DKnews.kz.
Қазақстан – халықаралық қауымдастық үшін әлі толық ашыла қоймаған, бірақ орасан зор туристік әлеуетке ие ел. «Kazakh Tourism» ұлттық компаниясының басқарма төрағасы Қайрат Садвақаcов жүргізетін «Born Bold. Travel Boldcast» подкасты аясында АҚШ-тың Қазақстандағы бұрынғы елшісі Дэниэл Розенблюм өз саяхаттары туралы әсерлерімен бөлісті. Ол елдің таңғажайып табиғаты, ерекше тағамдары, мәдени ерекшеліктері және туризм саласын дамыту перспективалары жайлы айтып берді.
Қазақстанды терең тану
Қазақстанда қызмет еткен жылдары Дэниэл Розенблюм елдің барлық өңірін аралап, географиясын мұқият зерттегені сонша, тіпті: «Менің Қазақстан географиясы туралы білімім Американыкінен де жақсы» деп әзілдеді.
Бұрынғы дипломат Қазақстанды тек аралап қана қоймай, оның мәдениеті мен дәстүрлеріне, халықтың күнделікті өміріне терең үңілді.
Оның ең жарқын әсерлерінің бірі – Батыс Қазақстанға, атап айтқанда Орал қаласына сапары болды. Онда ол алма бағы мен жүзім өсіретін ғалым ерлі-зайыптылармен танысты. Олар ерекше жеміс сорттарын өсірумен қатар, ғылыми зерттеулермен де айналысады.
Елші сол жерде тікелей ағаштан дәм татқан алмалардың дәмін ешнәрсемен салыстыруға келмейтінін айтып: «Бұл сондай дәмді болды, сөзбен жеткізу мүмкін емес. Дүкенде сатылатын өнімдерден әлдеқайда тәтті» деп ерекше таңданысын білдірді.
Гастрономиялық жаңалықтар: бәйге бесбармаққа тиесілі
Қазақстан асханасы да экс-елшінің жадында жарқын із қалдырды. Әсіресе, дәстүрлі көшпенділер тағамы – бесбармақ ерекше әсер еткен.
«Бұл мен үшін нағыз жаңалық болды, АҚШ-қа қайтқан соң бұл тағамды қатты сағынатын боламын», – деді ол.
Подкаст барысында FoodieStan тұжырымдамасы таныстырылды. Бұл – қонақтарға қазақтың дәстүрлі тағамдарын дайындау мен дәмін татуға мүмкіндік беретін интерактивті шеберлік сабақтары. Мұндай тәсіл туристерді ұлттық тағам мәдениетіне жақындастырып қана қоймай, оларды ас дайындау үдерісінің белсенді қатысушысына айналдырады.
Қазақстан туризмінің даму мүмкіндіктері
Розенблюмнің айтуынша, Орталық Азия аймағы туризмді дамыту тұрғысынан алып қарағанда зор әлеуетке ие. Қазақстан саяхатшыларды табиғи көрікті жерлерімен, тарихи мұраларымен және қонақжай халқымен тарта алады.
Туризмді дамыту бағытында маңызды қадамдардың бірі – Түркістанда туризм және қонақжайлылық мектебінің ашылуы. Бұл қадам саладағы қызмет көрсету сапасын жақсартуға мүмкіндік береді. Сондай-ақ, Қазақстан өз туристік саласын кино мен медиа арқылы насихаттауға басымдық беріп отыр. Мысалы, Netflix платформасымен бірлескен жоба – ортағасырлық Қазақстан туралы фильм түсіру жоспары, шетелдік көрермендердің ел тарихына деген қызығушылығын арттыруға бағытталған.
Туризмді насихаттау: АҚШ, Қытай және халықаралық нарықтар
Қазақстанды халықаралық деңгейде ілгерілету – басты міндеттердің бірі. Экс-елшінің пікірінше, кино, халықаралық көрмелер және ірі медиа платформалармен серіктестік – ең тиімді стратегиялардың бірі. Бұл тұрғыда, The Society of American Travel Writers конференциясы маңызды рөл атқарады. Ол Қазақстан мен АҚШ арасындағы туристік саланың даму перспективаларын талқылауға мүмкіндік береді.
2024 жыл Қытайда Қазақстанның туризм жылы деп жарияланғандықтан, бұл елден туристер тартудың жаңа мүмкіндіктерін ашады. Сонымен қатар, Қазақстан мен АҚШ арасында тікелей әуе рейстерін ашу мәселесі қарастырылуда. Егер бұл жүзеге асса, американдық саяхатшылар үшін Қазақстанға келу әлдеқайда жеңілдейді.
Тарихи туризм және трансшекаралық бағыттар
Қазақстанның ерекше туристік бағыттарының бірі – «қара туризм». Елдің тарихи оқиғалармен байланысты орындары – бұрынғы ГУЛАГ лагерьлері, Семей ядролық полигоны, «КСРО-ға қайта оралу» саяхаттары шетелдік туристер үшін ерекше қызықты болары сөзсіз.
Сонымен қатар, Орталық Азия елдері арасында трансшекаралық туризмді дамытуға басымдық берілуде. Подкаст барысында Қазақстан мен Өзбекстан арасындағы серіктестік, жаңа веломаршруттар және Байқоңыр мен Арал теңізіне саяхат тақырыптары қозғалды.
Табиғат және экотуризм: Маңғыстаудан бастап Астана маңындағы қоқиқаздарға дейін
Қазақстанның табиғи сұлулығы – туристерді тартудың басты факторларының бірі. Розенблюм ерекше атап өткен орындардың бірі – Маңғыстау. Оның ғажайып марстық пейзаждары, бірегей жартас түзілімдері мен көне некропольдері табиғатты сүйетін саяхатшылар мен фотографтар үшін таптырмас орын.
Елдегі қорықтар мен ұлттық парктер де айрықша қызығушылық тудырады. Бұрынғы елші Астана маңындағы қоқиқаздар мен киіктерді тамашалау мүмкіндігін ерекше атап өтті. Қазақстанның бай флорасы мен фаунасы экотуризмнің дамуына үлкен мүмкіндік береді.
Қазақстан – шетелдіктердің көзімен
Подкастта айтылған негізгі ой – Қазақстан туризмінің болашағы зор. Оның табиғаты, тағамдары, тарихы, мәдениеті және стратегиялық орналасуы шетелдік саяхатшыларды қызықтыруда маңызды рөл атқарады.
Ел туризмді дамыту бойынша ауқымды шаралар атқаруда: инфрақұрылымды жақсарту, инвесторлар тарту, халықаралық деңгейде танымалдылықты арттыру, жаңа туристік бағыттар құру. Дэниэл Розенблюмнің пікірінше, Қазақстан туризмінің болашағы жарқын, ал елдің ең басты құндылығы – оның халқы.
