Қазақстан шахматшылары сеньорлар арасындағы командалық әлем чемпионатының қола жүлдегері атанды, деп хабарлайды DKnews.kz.
Команданың ойынына жоғары баға берген Қазақстан шахмат федерациясының президенті Тимур Турлов:
«Прагада өткен командалық әлем чемпионатында біздің сеньорлардың тамаша ойыны Қазақстан шахмат мектебінің күші мен шеберлігін тағы да көрсетті. Әлемнің 28 елінің үздік гроссмейстерлерімен табан тірескен күресте олар қола медальға ие болды! Мұндай нәтиже жас буын ойыншыларды қуанышқа бөлеп қана қоймай, жетістікке жетуге ынталандырады. Қазақстандық сеньорларды шын жүректен құттықтай отырып, биылғы шахмат маусымында жеңістен жеңіске жете беруін тілеймін» Тимур Турлов, Қазақстан шахмат федерациясының президенті
Жарыстың барысы
Ұлттық құрама сапында жарысқа гроссмейстерлер Міртас Қажығалиев, Павел Коцур және Серікбай Темірбаев, халықаралық шеберлер Ерлан Тікжанов пен Валерий Мин қатысты. Команда капитаны гроссмейстер Пётр Костенко болды. Финалдық турда қазақстандықтар Англия-1 құрамасымен тең түсіп, турнирде үшінші орынды қамтамасыз етті.
50+ жас санатындағы соңғы турдың алдында 13 командалық ұпай жинаған Қазақстан, АҚШ және Италия командалары көш бастады, сондай-ақ Германия («Конфлуэнция») және Венгрия құрамасы да алтын медаль алуға үміткер болды. Қазақстандық шахматшылар Англия-1 командасына қарсы ойнаған негізгі тур тартысты өтті.
Қазақстан құрамалары және әйелдер командасы
Чемпионатқа Қазақстанның үш құрамасы: екеуі 50+ жас санатында және бір команда 65+ санатында қатысты.
Қазақстанның әйелдер құрамасы әйелдер арасындаңы 50+ жас санатында төртінші орынға ие болды. Қажырлы күрес жүргізгеніне қарамастан, шешуші турда ол 1,5–2,5 есебімен Оңтүстік Лимбург (Нидерланд) командасынан жеңіліп қалды.
Тарихи анықтама
50 жастан асқан шахматшылар арасындағы командалық әлем чемпионаты алғаш рет 2004 жылы Мэн аралында өтті. 2014 жылдан бастап ол тұрақты түрде өткізіледі. 2025 жылы турнирге 28 елдің 108 командасы, соның ішінде 49 гроссмейстер және 57 халықаралық шебер қатысты.
Қазақстандық сеньорлар үшін бұл чемпионатқа қатысу дебют болды, бірақ олар бірден медаль жеңіп алып тамаша нәтиже көрсетті. Осынау жетістік Қазақстан шахмат мектебінің деңгейі жоғары екенін растап, біздің спортшыларымызға әлемдік алаңда тамаша болашаққа жол ашып отыр.
Қорытынды кесте (50+ жас санаты):
- АҚШ – 15 командалық ұпай, 24 жеке ұпай
- Италия – 15, 23
- Қазақстан – 14, 24
- Англия-1 – 12, 24,5
- Англия-2 – 12, 24
Қазақстан шахматшыларының бұл жетістігі – әлемдік шахмат қоғамдастығындағы еліміздің позициясын нығайтып, спортшылардың жаңа буындарын жаңа жеңіске жете беруге шабыттандыратын елеулі оқиға.
