Түркістанда қазақ тілінің ғылым тілі ретінде дамуы талқыланды, деп хабарлайды DKnews.kz.
Қожа Ахмет Яссауи атындағы Қазақ-Түрік университетінде «Қазақ тілі – ғылым тілі: жасанды интеллект және терминология» атты II халықаралық симпозиум өтті. Шара барысында Мемлекет басшысының тапсырмасы бойынша қазақ тілінің ғылым тілі ретінде дамуы мәселелері қарастырылды. Сонымен қатар, қазақ тілінің аясын кеңейту жолдары жасанды интеллект арқылы талқыланды. Симпозиумға Сенат депутаты Дархан Қыдырәлі қатысып, қазақ тілінің болашағы үшін цифрландырудың маңыздылығын атап өтті.
«Бүгінгі таңда адамзат цифрлы әлемде өмір сүріп жатыр, сондықтан тілдерді сақтау және қолдану мәселесі ерекше өзектілікке ие. Бұл қазақ тілі үшін де маңызды, себебі оның цифрлы ортада кеңінен қолданылуы унификацияланған және цифрланған сөздік қорын, тілдік дерекқорды талап етеді. Егер біз цифрлы сөздік қорын қалыптастыра алсақ, бұл қазақ тіліндегі жасанды интеллектінің жұмыс сапасын айтарлықтай арттырады» Дархан Қыдырәлі
Симпозиум барысында лингвистика, жасанды интеллект және терминология саласындағы жетекші мамандар қазақ тілін қазіргі заманғы технологиялармен интеграциялау мәселелерін талқылап, өз ұсыныстарын ұсынды.
