Қазақстан мен Әзербайжан заң шығару саласындағы ынтымақтастықты нығайтуда, деп хабарлайды DKnews.kz.
Қазақстанның Әзербайжандағы Елшісі Әлім Байел Әзербайжан Республикасының Милли Мәжілісінің Төрайымы Сахиба Гафаровамен кездесті.
Дипломат Қазақстан Республикасы Парламенті Мәжілісінің Төрағасы Ерлан Қошановтың атынан 2025 жылғы маусымда Астанада өтетін ТүркПА 14-ші Пленарлық сессиясына шақыру хатын табыстады.
Ә. Байел қазақ-әзербайжан қатынастарының жоғары динамикасын, сауда-экономикалық және көлік-логистикалық байланыстардың нығаюын, сондай-ақ парламентаралық ынтымақтастықтың маңыздылығын атап өтті.
Елші Қазақстан тарапының ТүркПА қызметінің тиімділігін арттыру, оны одан әрі институционализациялау және беделді халықаралық парламентаралық ұйым ретінде нығайту қажеттілігі туралы ұстанымына назар аударды.
С. Гафарова шақыруды қабылдап, екіжақты және көпжақты қатынастарға оң әсер ететін факторлардың бірі заң шығарушы органдардың өзара іс-қимылы екенін атап өтті.
Спикер Әзербайжанның Милли Мәжілісі ҚР Парламенті Мәжілісімен де, Сенатымен де тығыз байланыс орнатқанын қанағаттанушылықпен атап өтті. Ол Қазақстан Президенті Қасым-Жомарт Тоқаевтың 2024 жылғы мемлекеттік сапары барысында Әзербайжан Парламентіне келуін жылы лебізбен еске алды.
Сонымен қатар елдер арасында депутаттық достық тобы жұмыс істейтіні, депутаттардың өзара сапарлары және халықаралық парламенттік ұйымдардың алаңдарында тұрақты кездесулер өткізілетіні аталып өтті. Сондай-ақ Милли Мәжілістің Төрайымы ТүркПА қызметін бірлесіп жетілдіруге дайын екенін білдірді.
Кездесу барысында одан әрі өзара іс-қимыл, соның ішінде Қазақстан-Әзербайжан парламентаралық достық тобының кезекті отырысын өткізу мәселелері талқыланды.
