13 маусым күні Алматыда, «Қазақконцерттің» үлкен залында, ауқымды мәдени шара – Бейжің операсы әртістерінің қойылымы өтті. Бірнеше сағат бойы зал мәдени алмасу орталығына айналып, сахна шеберлік сабақтарымен, викториналармен, дәстүрлі дәм-татымдармен және Қытайдың материалдық емес мұраларын таныстырумен үйлесіп жатты.
Бұл шара шын мәнінде айтулы мәдени оқиғаға айналып, жүздеген көрерменді, дипломаттарды, мәдениет қайраткерлерін және шығыс эстетикасын бағалаушыларды жинады. Қойылыммен қатар қонақтар шеберлік сабақтарына қатысып, викториналарға жауап беріп, қытай өнерпаздарымен тікелей сұхбаттасып, дәмнен ауыз тиді.
Қытайда цзинцзюй деп аталатын Бейжің операсы – жай ғана театр емес. Бұл – поэзия, ым-ишара, акробатика мен көпқабатты символиканы біріктірген күрделі өнер түрі. Жарқын костюмдер мен бетперделер, музыкалық ырғақтар мен хореография тек оқиғаның желісін ғана емес, кейіпкерлердің ішкі сезімін, моральдық қайшылығын, философиялық толғанысын жеткізеді. Бейжің операсында әрбір қимыл – бас изеуінен бастап жең сілтеуге дейін – мағынаға толы және мұқият өңделген. Артистер жылдар бойы машықтанып, дауысты меңгеріп, мимика мен пластиканы үйренеді. Олардың өнері – қытай мәдениетінің тірі энциклопедиясы іспетті. Онда көне аңыздар, тарихи шежірелер мен конфуцийлік даналық қатар өріледі.
Ұйымдастырушылардың айтуынша, бұл шара Қазақстан мен Қытай арасындағы мәдени байланысты нығайтып қана қоймай, алматылықтарға дәстүрлі қытай өнерінің бай қырларын таныстыруға мүмкіндік берді.
ҚХР-дың Алматыдағы Бас консулы Цзян Вэй ханым атап өткендей:
«Соңғы бірнеше ай ішінде Алматыда оннан астам қытай-қазақ мәдени шарасы өтті. Бүгінгі Бейжіңнен келген әртістердің қойылымы – осы игі дәстүрдің жалғасы. Бейжің – ұлы мәдени мұрасы бар қала, оның жеті нысаны ЮНЕСКО тізіміне енген. Ал Бейжің операсы – адамзаттың материалдық емес мұрасы ретінде танылған бірегей өнер. Бұл мәдениетті қазақ достарымызбен бөлісіп отырғанымызға қуаныштымыз» ҚХР-дың Алматыдағы Бас консулы Цзян Вэй
Көрермендердің ыстық ықыласына қарағанда, Бейжің операсы алматылықтардың жүрегін жаулап қана қоймай, мәдени диалогтың сұлулығы мен маңыздылығын еске салғандай болды. Өйткені халықтар арасындағы терең өзара түсіністікке қол жеткізудің ең әсерлі жолы – өнер арқылы болмақ.
