SCAT әуе компаниясы Петропавл – Шарм-эш-Шейх бағытын ашты, деп хабарлайды DKnews.kz.
2025 жылғы 2 шілдеде Петропавл халықаралық әуежайынан алты жыл ішінде алғаш рет халықаралық жолаушылар рейсі ұшты. Бұл тарихи сәт: SCAT әуе компаниясы Петропавл – Шарм-эш-Шейх (Мысыр) бағыты бойынша чартерлік қатынасты іске қосты. Ұшулар әр 10 күн сайын заманауи Boeing 737 ұшағымен орындалады.
Бұл жаңалық тек әуе саласы үшін емес, тұтас Солтүстік Қазақстан облысы үшін маңызды оқиға. Петропавл қаласы халықаралық әуе қатынастарына қайта қосылып, тұрғындарға, туристерге және кәсіпкерлерге жаңа мүмкіндіктер есігін ашты.
Енді Египетке бірден, еш қиындықсыз
Бағыт кездейсоқ таңдалған жоқ: Мысыр — қазақстандықтар арасында ең танымал демалыс орындарының бірі. Енді СҚО тұрғындарына басқа қалаларға барып әуре болудың қажеті жоқ — күн мен теңіз бір қадам жақындады.
SCAT компаниясының мәліметінше, бұл бағыт ұзақ күтілген әрі сұранысқа ие болды:
«Мысыр — қазақстандықтар үшін ең танымал туристік бағыттардың бірі. Петропавлдан рейстің ашылуы солтүстік өңір тұрғындары үшін тікелей ұшу географиясын кеңейтеді, олар енді ірі әуежайларға барып әуре болмайды», — деп хабарлады компания өкілдері.
Әуежай халықаралық деңгейге оралды
Петропавл әуежайынан халықаралық ұшулар 2019 жылы тоқтатылған еді. Сол уақыттан бері әуежай үлкен жолдан өтті: эксплуатант сертификаты қайтарылып, кейін сенімгерлік басқаруға берілді, инфрақұрылым толық жаңартылды.
«Халықаралық қатынастың қайта ашылуы — тек әуежай үшін емес, бүкіл өңір мен СҚО тұрғындары үшін маңызды оқиға. Демалғысы келген жандар енді басқа облыстарға сабылмай-ақ өз қаласынан тікелей ұша алады. Рейсті іске қосар алдында көп дайындық жұмыстары жүргізілді: шекара қызметі мен кеден қызметкерлеріне арналған ғимараттар жаңартылып, қайта бейімделді», — деді Петропавл халықаралық әуежайының уақытша директоры Мустафа Йылтан Октем.
Жаңа рейстер үшін шекаралық және кедендік бақылау аймақтары жабдықталып, халықаралық авиациялық талаптарға толық сай келетін инфрақұрылым қамтамасыз етілді.
Бұл іске кім мұрындық болды?
Петропавл әуежайын «Қызыл-Жар халықаралық әуежайы» ЖШС басқарады. 2022 жылы оған бес жыл мерзімге сенімгерлік басқару құқығы берілді. Бұл компанияның қызметін Orbis Kazakhstan тобы сенімді өкіл арқылы қадағалайды.
Orbis Kazakhstan бұл жобаны әлеуметтік маңызды бастама ретінде қабылдады. Әуежай жұмысын қайта жолға қою үшін 1,2 миллиард теңгеден астам инвестиция құйды. 2024 жылы әуежай 126 879 жолаушыға қызмет көрсетті — бұл бұрынғы қиын кезеңдерден кейінгі үлкен нәтиже.
Orbis Kazakhstan: әлеуметтік жауапты холдинг
Orbis Kazakhstan — 2001 жылы кәсіпкерлер Фаррух және Сухраб Махмудовтар негізін қалаған қазақстандық холдинг. Қазіргі таңда топ автосалалар, құрылыс, техника дистрибуциясы, мұнайсервис, агробизнес және басқа салаларда белсенді.
2024 жылы холдингтің жалпы айналымы $1,5 млрд болды. Көлік инфрақұрылымын дамыту — олардың стратегиялық басымдығы. Петропавл әуежайы — осы бағыттағы жарқын мысал.
Алда не күтіп тұр?
Халықаралық рейстің қайта жандануы — тек бастамасы. Әуежай басшылығы жаңа бағыттарды зерттеп жатыр: туристік те, іскерлік те ұшулар жоспарлануда.
Петропавл қаласы мен СҚО тұрғындары үшін бұл — тек ыңғайлылық емес, жаңа мүмкіндіктер: саяхат, іскерлік сапарлар, халықаралық байланыстар мен кәсіпкерлік дамуының жаңа кезеңі.
Петропавл көкке қайта самғады. Бұл — жаңа тарихтың басы ғана.
