Қазақстан мен Таиландтың әскери-өнеркәсіптік кешендегі ынтымақтастық перспективалары Бангкокта талқыланды, деп хабарлайды DKNews.kz.
Қазақстан Республикасының Таиланд Корольдігіндегі Елшісі Марғұлан Баймұхан Бангкоктағы IMPACT көрме және жиналыс орталығында «Әріптестік күші» ұранымен өткен «Defence & Security 2025» халықаралық көрмесінің ашылу салтанатты рәсіміне қатысты. Іс-шараны Таиланд Корольдігінің Қорғаныс министрі Нотапон Наркпанич басқарды.
Іс-шара барысында қатысушыларға қорғаныс технологияларының соңғы жетістіктері, сондай-ақ жетекші халықаралық компаниялардың инновациялық жобалары таныстырылды.
Сонымен қатар көрме аясында қазақ дипломат Таиландтың Қорғаныс министрлігінің, қарулы күштерінің және өнеркәсіптік кәсіпорындарының, сондай-ақ шетелдік компаниялар мен мамандандырылған ұйымдардың өкілдерімен жұмыс байланыстарын орнатты.
Іс-шара шеңберінде Таиландтың жетекші өндірістік компаниялары мен әскери-өнеркәсіптік кешендегі ғылыми-техникалық мекемелерінің, соның ішінде Chaiseri Co. Ltd, Thai Rung Union Car PLC, Marsun PLC, Seatboat Ltd және Таиландтың Технологиялары институтының басшылығымен кездесулер өтті.
Кездесулер барысында Қазақстан мен Таиланд арасындағы тәжірибе алмасу, ынтымақтастық орнату және екі елдің әскери-техникалық салаларындағы өндірушілер арасында бірлескен іс-шаралар ұйымдастыру жөніндегі серіктестікті нығайту перспективалары талқыланды.
«Қорғаныс және қауіпсіздік 2025» халықаралық көрмесі – Таиланд Қорғаныс министрлігінің қолдауымен екі жылда бір рет өткізілетін ең ірі аймақтық іс-шараларының бірі. Онда 60-тан астам елден қорғаныс ведомстволарының, өнеркәсіптің және сарапшылар қауымдастығының өкілдері қорғаныс пен қауіпсіздік саласындағы озық технологияларды көрсету және халықаралық ынтымақтастықты нығайту мақсатында жиналады.
