Singapore FinTech Festival бүгінде әлемдік қаржы мен технологиялар бағытын айқындайтын басты алаңдардың бірі саналады. Әдетте мұнда АҚШ, Қытай, Үндістан және Оңтүстік-Шығыс Азия көш бастап тұрады. Ал биыл бұл қатарға сенімді түрде жаңа ойыншы қосылды - Орталық Азия, деп хабарлайды DKNews.kz.
12-14 қараша аралығында өңір алғаш рет өз павильонын - Central Asia Pavilion-ді ұсынып, бірден назар аудартты. Биылғы фестивальге 134 елден 65 000+ қатысушы жиналды, бұл Орталық Азия үшін көріну мүмкіндігін айрықша маңызды етті.
Ең бастысы - өңір Сингапурға жай ғана қатысу үшін емес, өз орнын анық көрсету үшін келді. Орталық Азия өзін біртұтас, өршіл және серпінді технологиялық хаб ретінде танытты.
MOST, Astana Hub, IT Park Uzbekistan және AIFC: өңірлік экожүйенің күші
Павильон операторы ретінде MOST холдингі шықты. MOST - венчурлық және private equity қорларын, цифрлық необанкті, білім беру бағдарламаларын және технологиялық хабтарды біріктіретін инвестициялық экожүйе.
Өңірді таныстырған негізгі ұйымдар:
- Astana Hub - халықаралық IT-кластер, әлемдік технологиялық екожүйелермен байланысты нығайтып келе жатқан инновациялық орта.
- IT Park Uzbekistan - 3000 резидент-компаниясы мен 600 белсенді стартаптан тұратын, қарқынды дамып жатқан технопарк.
- AIFC - ағылшын құқығына негізделген, бизнесті әлемдік стандарттармен жүргізуге мүмкіндік беретін бірегей юрисдикция.
Бұл ұйымдар өңірді жеке-жеке емес, біртұтас технологиялық күш ретінде көрсетті.
Орталық Азияға деген сұраныс күшейді
Павильонның үш күндік жұмысы барысында өкілдер Gobi Partners, Plug and Play APAC, PMA, Phillip Capital, FAO, Enterprise Singapore, META сияқты ірі инвесторлар және корпорациялармен көптеген кездесулер өткізді.
Бұрын Орталық Азияны «перспективалық аймақ» ретінде қарастырса, қазір әңгіме нақты жобалар, пилоттар және бірлескен нарықтық стратегиялар төңірегінде өрбиді. Өңір алғаш рет жаһандық технологиялық диалогтың толыққанды қатысушысына айналды.
ASEAN - Central Asia Corridor: жаңа көпір қалыптасып келеді
Өңір үшін ең маңызды сәттердің бірі - “Connecting FinTech Ecosystems Around the World: ASEAN - Central Asia Corridor” атты жабық сессия. Astana Hub бас директоры Мағжан Мадиев бұл талқылауда GFTN өкілдерімен бірге Орталық Азияның рөлін таныстырды.
50-ден астам венчурлық қорлар, банктер және финтех-компаниялар қатысқан сессияда трансшекаралық төлемдер, технология экспорты және ASEAN елдерімен жаңа серіктестік бағыттары талқыланды.
Орталық Азияның Батыс пен Азия арасындағы жаңа технологиялық көпірге айналуы - уақыт талабы екенін осы кездесулер көрсетті.
Өңірлік бренд қалыптастыру: нетворкингтің жаңа форматы
MOST, Astana Hub және AIFC бірлесіп Сингапурда алғаш рет VC Party өткізді. Бұл формат Қазақстанда пайда болып, қазір халықаралық деңгейде танымалдылыққа ие болуда.
Сингапурдағы кешке 35-тен астам серіктес қатысты. Еркін форматтағы байланыс, тікелей диалог және нақты ұсыныстар - өңірге деген қызығушылықты одан әрі арттырды.
Қонақтар Орталық Азия туралы көбірек білгісі келетіні, жаңа нарық ретінде өңірге байыппен қарап отырғаны айқын байқалды.
Өңір жетекшілерінің көзқарасы
Павел Коктышев, MOST Holding бас директоры
Павильон жұмысы барысында Павел Коктышев өңірдің халықаралық бағыттағы стратегиясын былай деп сипаттады:
«MOST Holding ретінде біз Сингапурдың жаһандық инвестициялық әлемдегі стратегиялық рөлін айқын көріп отырмыз. Бүгінде мұнда жалпы портфелі 17 000-нан астам компаниядан тұратын 1000-нан жоғары венчурлық қор жұмыс істейді, ал ел бірмүйізді стартаптар саны бойынша әлемде 10-орында және Азияда 15 бірмүйізді компаниясымен 3-орында тұр. Үш күндік форум барысында біз технологиялық корпорациялардан бастап жеке инвесторларға дейінгі тараптардан ынтымақтастыққа деген үлкен сұраныс бар екенін байқадық. MOST үшін басты міндет - өңірге тікелей шетелдік инвестиция тарту, және Singapore FinTech Festival-ға қатысуымыз бұл бағытта алғашқы нәтижелерін бере бастады».
Мағжан Мадиев, Astana Hub бас директоры
Мағжан Мадиев Орталық Азия мен әлемдік технологиялық орталықтар арасындағы байланысты былай түсіндіреді:
«Astana Hub Орталық Азия мен әлемдік технологиялық орталықтар арасындағы көпірлерді қалыптастырып келеді. Бүгінде біздің Кремний аңғарында, Лондонда, Шанхайда және Дубайда өкілдіктеріміз бар. Ал Сингапур - біз серіктестерді, инвесторларды және ынтымақтастыққа ашық нарықты көріп отырған негізгі бағыттардың бірі. Singapore FinTech Festival Орталық Азияға деген қызығушылықтың артып келе жатқанын көрсетті, және өңір әлемдік технологиялық қауымдастық үшін барған сайын маңызды бола түсуде. Astana Hub үшін бұл біздің стартаптарымызға Оңтүстік-Шығыс Азияға жол ашып, экожүйелер арасындағы байланысты нығайту мүмкіндігі».
Фестиваль өңірге не берді?
Singapore FinTech Festival Орталық Азия үшін жай ғана таныстырылым емес, жаңа кезеңнің бастауы болды. Бұл - өтпелі кезең:
- локалдық бастамалар → халықаралық қатысу,
- жеке стартаптар → өңірлік стратегия,
- реактивті даму → проактивті ілгерілету.
MOST инновацияларды қолдауды жалғастыруда. Astana Hub жаһандық кеңеюді күшейтуде. IT Park Uzbekistan экспорттық әлеуетін арттыруда. AIFC халықаралық сенімге негізделген инфрақұрылым қалыптастыруда.
Фестиваль Орталық Азияның жаһандық нарық үшін жаңа өсу алаңы ретінде қабылданғанын айқын көрсетті.
