Солтүстік Қазақстан облысы мен Қытайдың Цзянсу провинциясы өңіраралық ынтымақтастықты нығайтуда, деп хабарлайды DKNews.kz.
«Қытай – Орталық Азия» тікелей сауда әріптестігі платформасында Солтүстік Қазақстан облысының (СҚО) аталған платформаға ресми түрде қосылу рәсімі өтті. Бұл қадам СҚО мен Қытайдың Цзянсу провинциясы арасындағы өңіраралық сауда-экономикалық ынтымақтастықты жаңа деңгейге көтеруге қосымша серпін берді.
СҚО-ның платформаға қосылуы туралы келісімге қол қою және Инвесторларды қолдау орталығының өкілдігін ашу рәсімі СҚО әкімі Ғауез Нұрмұхамбетовтің, Қазақстан Республикасының Шанхайдағы Бас консулы Нұрлан Аққошқаровтың, Нанькин қаласы Сюаньу ауданының басшысы Чжан Чжичаоның және Jiangsu SOHO Holding Group компаниясы вице-президенті Ли Миннің қатысуымен өтті.
Цзянсу провинциясы көптеген жылдар бойы Қытайдың екінші ірі өңірлік экономикасы ретінде танылып келеді: Қытай өнеркәсібінің 15%-ын және әлемдік индустрияның 3%-ын қамтамасыз етеді (2024 жылғы өңірлік ЖІӨ – 1,9 трлн АҚШ долларына жетті). Ал Солтүстік Қазақстан облысы – Қазақстанның негізгі экономикалық аймақтарының бірі, қуатты агроөнеркәсіптік әлеуеті мен тұрақты өнеркәсіптік базасы бар өңір.
Ашылу рәсімінен кейін тараптар Jiangsu SOHO Holding Group басшылығымен сауда-экономикалық ынтымақтастықты тереңдету жөнінде іскерлік келіссөздер жүргізді. Кездесу барысында СКО әкімі Ғ.Нұрмұхамбетов облыстың инвестициялық мүмкіндіктерін егжей-тегжейлі таныстырып, ынтымақтастықтың негізгі бағыттарын атап өтті. Сонымен қатар, СҚО инвестициялық әлеуеті мен экономикалық дамуы туралы презентациясы өтті. Тараптар тұрақты коммуникация механизмін құру және нақты инвестициялық жобаларды алға жылжыту жөнінде уағдаласты.
СҚО-ның платформаның жұмысына қосылуы Қазақстанның солтүстік өңірі мен Қытайдың шығыс провинциясы арасындағы өңіраралық ынтымақтастық арналарының кеңеюіне және сауда-экономикалық байланыстардың нығаюына мүмкіндік береді.
Платформа жұмысына бұған дейін келесі өңірлер қосылған, атап айтқанда: Батыс Қазақстан облысы: 2025 жылғы 9 қазанда «Aqjaiyq ӘКК» инвестициялық-сауда өкілдігі Нанькин қаласында ашылды.
Ақмола облысы: 2025 жылғы 5 қарашада Шанхай қаласында өткен Қытай халықаралық импорт көрмесі аясында «Aqmola Invest» даму және инвестициялар орталығының Нанькиндегі өкілдігін ашқаны туралы жарияланды.
