Қазақстан Каспий құбыр консорциумына жасалған шабуылға байланысты ресми наразылық білдірді, деп хабарлайды DKNews.kz.
Қазақстан Республикасының Сыртқы істер министрлігі Новороссийск теңіз порты акваториясында халықаралық Каспий құбыр консорциумының (КҚК) стратегиялық маңызы бар инфрақұрылымына жасалған кезекті шабуылға байланысты ресми мәлімдеме жасады. МӘлімдемені ҚР СІМ-нің ресми өкілі Айбек Смадияров таратты.
Сыртқы саяси ведомствоның мәліметінше, бұл оқиға – халықаралық құқық нормаларымен қорғалатын азаматтық нысанға бағытталған үшінші мақсатты агрессиялық акт. Қазақстан тарапы мұндай әрекеттер тек аймақтық емес, сонымен бірге жаһандық энергетикалық жүйенің тұрақтылығына да қауіп төндіретінін атап өтті.
Қазақстан жаһандық энергетикалық нарықтың жауапты қатысушысы ретінде энергия ресурстарын тұрақты, сенімді және үздіксіз жеткізудің маңызын ерекше атап өтеді. Каспий құбыр консорциумы — халықаралық энергетикалық инфрақұрылымның маңызды бөлігі және әлемдік энергетикалық баланстың тұрақтылығын қамтамасыз етуде шешуші рөл атқарады.
КҚК жұмысының бұзылуы немесе тоқтауы әлемдік экономикаға, соның ішінде энерготасымал нарығына айтарлықтай теріс әсер етуі мүмкін. Осыған байланысты Қазақстан кез келген агрессиялық әрекетті халықаралық нормаларға қайшы деп санайды.
СІМ мәлімдемесінде Қазақстан бұл оқиғаны Қазақстан мен Украинаның екіжақты қатынастарына нұқсан келтіретін әрекет ретінде бағалайтынын баса көрсетті. Осыған орай Астана украин тарапынан мұндай жағдайлардың қайталануына жол бермеу үшін нақты әрі тиімді шаралар қабылданатынына үміт білдірді.
Қазақстан Республикасының Сыртқы істер министрлігі КҚК нысандарының айналасындағы жағдайды мұқият бақылауды жалғастыратынын хабарлады. Қажет болған жағдайда стратегиялық маңызды инфрақұрылымның қауіпсіздігін қамтамасыз ету мақсатында тиісті шаралар қабылданатыны атап өтілді.
