Дональд Трамп Қасым-Жомарт Тоқаевпен телефон арқылы сөйлескенін хабарлап, әңгімені «өте жақсы әрі мазмұнды» деп сипаттады. Бұл туралы Ақ үй басшысы Truth Social әлеуметтік желісіндегі парақшасында жазды.
Трамптың айтуынша, әңгіме барысында көшбасшылар өзекті халықаралық мәселелердің кең ауқымын талқылаған. Негізгі назар жалғасып жатқан қақтығыстарды реттеу тақырыбына, сондай-ақ жаһандық қауіпсіздікті нығайту перспективаларына аударылды. Сонымен қатар АҚШ пен Қазақстан арасындағы сауда-экономикалық ынтымақтастықты дамыту және екіжақты байланыстарды кеңейту мәселесі қозғалды.
АҚШ президенті әріптестікті одан әрі тереңдетудің маңызын атап өтіп, сауда мен инвестициялар саласындағы өзара іс-қимылды күшейтуге мүдделілігін білдірді. Осы тұрғыда Дональд Трамп Қасым-Жомарт Тоқаевты келесі жылы Майами қаласында өтуі күтілетін G20 саммитіне қатысуға шақыру ниеті бар екенін мәлімдеді.
Бұған дейін АҚШ пен Қазақстан президенттері арасындағы телефон әңгімесі ұзаққа созылып, мазмұнды сипатта болғаны хабарланған. Әңгіме соңында Қасым-Жомарт Тоқаев Дональд Трампты өзіне қолайлы уақытта Қазақстанға ресми сапармен келуге шақырып, диалогты жалғастыруға және екіжақты қатынастарды нығайтуға дайын екенін атап өтті.
