Қазақстан мен Израиль экология, «жасыл» технологиялар және тұрмыстық қалдықтарды қайта өңдеу бағытындағы ынтымақтастықты кеңейтіп келеді, деп хабарлайды DKNews.kz.
Қазақстанның Израильдегі Елшісі Даулет Ембердиев Тель-Авив агломерациясына қызмет көрсететін Hiriya Recycling Park қоқысты қайта өңдеу кешеніне барды.
Израильдің тәжірибесі немен қызықтырды
Сапар барысында Елші Гуш-Дан қалалары қауымдастығының бас директоры Гиль Ливне және Ассоциация басқарма төрағасы, Тель-Авив қаласы әкімінің орынбасары Реувен Ладиянскимен кездесті.
Қауымдастық өкілдері Хирияның тарихы мен жинақталған тәжірибесі туралы айтып берді: бұрынғы полигон бүгінде қалдықтарды тиімді түрде қайта өңдеп, екінші рет пайдалануға мүмкіндік беретін заманауи экологиялық паркке айналған.
Ерекше назар аудартқан жобалар
Ең алдымен мына бағыттар қызығушылық тудырды:
- өнеркәсіп кәсіпорындары үшін отын өндіруге арналған RDF технологиясы
- Хирияның «Қоршаған орта бойынша білім беру орталығы» мұнда оқушылар, студенттер және қала тұрғындары табиғатты қорғау мәдениетін үйренеді
Бұл модель технология мен экобілім беруді ұштастырып, табиғатқа жауапкершілікпен қарауды қалыптастырады.
Алдағы ынтымақтастық
Сапар қорытындысы бойынша тараптар:
- тиісті министрліктер
- мүдделі муниципалитеттер
- бизнес өкілдері
арасында байланыс орнату жөнінде келісімге келді.
Мақсат - озық тәжірибе алмасу, бірлескен жобаларды іске асыру және қалалар экологиясы мен тұрмыстық қалдықтарды өңдеу саласында заманауи шешімдерді енгізу.
Осылайша, Қазақстан экологиялық бағыттағы халықаралық әріптестікті нығайтып, Израильдің тиімді тәжірибесін өз дамуына қолдануға мүмкіндік алып отыр.
