Қазақстан мен Словения арасындағы ынтымақтастық жаңа деңгейге көтерілуде. Қазақстан Республикасының Словениядағы Төтенше және Өкілетті Елшісі Алтай Әбибуллаев Любляна қаласы мэриясының басшылығымен кездесіп, екі ел арасындағы өзара іс-қимылды аймақтық және муниципалдық деңгейде кеңейту мәселелерін талқылады, деп хабарлайды DKNews.kz.
Кездесудің басты ұсыныстарының бірі - Қазақстан мен Словения астаналары, Астана мен Любляна арасында бауырлас қала қатынастарын орнату болды. Бұл бастама қалалық шаруашылықты басқару, заманауи инфрақұрылымды дамыту, бірлескен жобаларды іске асыру және халықтар арасындағы өзара түсіністікті нығайту үшін тиімді алаң ретінде қарастырылып отыр.
Словения тарапы Астананың қарқынды дамуына ерекше қызығушылық танытты. Әсіресе, елордасының Oxford Economics 2025 рейтингіндегі орны, сондай-ақ Қазақстан Президенті 2025 жылғы 24 желтоқсанда елорда алдында айқындап берген басым міндеттер назарға алынды. Сонымен қатар Astana Smart City бастамасының жүзеге асырылуы қазіргі заманғы қалалық даму үлгісі ретінде жоғары бағаланды.
Тараптар қала құрылысы мен муниципалдық басқару саласындағы тәжірибе алмасуға айрықша мән берді. Кездесу барысында қалалық коммуникацияларды жетілдіру, экологияны қорғау, тұрғындардың қауіпсіздігін қамтамасыз ету, көлік ағындарын басқару, қалалық инфрақұрылымдағы жасанды интеллектінің рөлі, сондай-ақ шетелдік туристер мен инвестиция тарту мәселелері кеңінен талқыланды.
Мәдени-гуманитарлық бағыт та назардан тыс қалған жоқ. Қазақстан мен Словения арасындағы дипломатиялық қатынастардың орнағанына 35 жыл толуына дайындық аясында Люблянада Қазақстан күндерін өткізу, бірлескен мәдени іс-шаралар ұйымдастыру және екі ел астаналары арасындағы ұзақмерзімді серіктестік пен достықты нығайту жөніндегі бастамалар қаралды.
Сарапшылардың пікірінше, мұндай қалалар арасындағы тікелей әріптестік қазіргі жағдайда ерекше маңызға ие. Ол Астана мен Любляна үшін жаңа мүмкіндіктер ашып қана қоймай, инвестиция, технология және туризм бағыттарында нақты нәтижелерге жол ашуы мүмкін.
