Қазақстанның Словениядағы Елшісі Алтай Абибуллаев Словения Республикасының Сыртқы және еуропалық істер министрлігінің Еуропалық істер, халықаралық құқық, мүдделерді қорғау және экономикалық дипломатия жөніндегі Мемлекеттік хатшысы Нева Грашичпен кездесу өткізді. Тараптар екі ел арасындағы ынтымақтастықтың басым бағыттарын талқылап, серіктестікті жаңа деңгейге көтеру мүмкіндіктеріне тоқталды, деп хабарлайды DKNews.kz.
Цифрландыру мен жасанды интеллект – басты басымдық
Кездесу барысында Қазақстан тарапы Мемлекет басшысының 5 қаңтарда «Түркістан» газетіне берген сұхбатында айтылған негізгі ой-түйіндермен таныстырып, 2026 жылдың Қазақстанда «Цифрландыру және жасанды интеллект жылы» деп жарияланғанын атап өтті.
Осы орайда тараптар сауда-экономикалық ынтымақтастық жөніндегі Үкіметаралық комиссияның 5-ші отырысына дайындық барысын және Люблянада «Digital Bridge» цифрлық форумын өткізу жоспарларын егжей-тегжейлі талқылады. Аталған форум цифрландыру мен жасанды интеллект саласында профильді мемлекеттік органдар, бизнес және сараптамалық қауымдастық өкілдерінің өзара іс-қимыл алаңына айналмақ.
Фармацевтика мен денсаулық сақтау саласындағы әріптестік
Кездесу қорытындысы бойынша тараптар фармацевтика саласындағы ынтымақтастықты одан әрі тереңдетуге мүдделілік білдірді. Әсіресе Қазақстан нарығында кеңінен танымал словениялық жетекші брендтер – Krka және Lek компанияларымен өзара іс-қимылды дамыту мәселесіне назар аударылды.
Сонымен қатар денсаулық сақтау мен медициналық технологиялар саласында бірлескен жобаларды кеңейту мүмкіндіктері де талқыланды.
Қазақстан – Еуразиядағы маңызды транзиттік торап
Транзиттік-көліктік және логистикалық ынтымақтастық аясында Елші Қазақстанның Еуразиялық кеңістіктегі стратегиялық транзиттік әлеуетін атап өтті. Ол Қазақстан Үкіметінің теміржол және мультимодальды бағыттарды қамтитын заманауи көлік-логистикалық инфрақұрылымды дамыту саясаты туралы баяндады.
Бұл тұрғыда Орта дәлізді дамытуға қатысудың және теңізге тікелей шығу мүмкіндігі жоқ еуропалық елдер үшін жеткізу тізбектерінің тұрақтылығын арттыруда Словенияның «Лука Копер» теңіз портының рөлі ерекше екені айтылды.
Энергетика, аэроғарыш және нанотехнологиялар
Кездесуде екіжақты энергетикалық ынтымақтастықтың өзекті мәселелері де қозғалды. Сонымен қатар словен тарапы аэроғарыш саласы мен нанотехнологиялар бағытында ынтымақтастық орнатуға қызығушылық білдіріп, ғылыми-технологиялық кооперация мен құзыреттер алмасудың маңызын атап өтті.
Құқықтық негізді кеңейту
Қазақстан мен Словения арасындағы серіктестікті ұзақмерзімді әрі тұрақты ету мақсатында тараптар шарттық-құқықтық базаны кеңейту бойынша қағидаттық өзара түсіністікке қол жеткізді. Атап айтқанда:
- инвестицияларды өзара қорғау және көтермелеу туралы келісім;
- дипломатиялық және қызметтік паспорт иелері үшін визасыз режим жөніндегі жаңа келісім;
- екі елдің сыртқы істер ведомстволары арасында консулдық консультациялар өткізу.
Болашаққа бағытталған серіктестік
Кездесу қорытындысы Қазақстан мен Словенияның серіктестігі цифрлық трансформация, инновация, логистика және жоғары технологиялар сияқты стратегиялық бағыттарға негізделетінін көрсетті. Тараптар бұл ынтымақтастықты жүйелі түрде дамытуға дайын екенін растады.
