Қазақстанның Моңғолиядағы Елшісі Алмас Сейтақынов Моңғолияның Азық-түлік, ауыл шаруашылығы және жеңіл өнеркәсіп министрі, сондай-ақ Қазақстан-Моңғолия сауда-экономикалық, ғылыми-техникалық және мәдени ынтымақтастық жөніндегі үкіметаралық комиссиясының төрағасы Мягмарсүрэнгийн Бадамсүрэнмен кездесті. Кездесу барысында екіжақты ынтымақтастықтың қазіргі ахуалы мен алдағы даму бағыттары талқыланды, деп хабарлайды DKNews.kz.
Кездесуге Моңғолияның Отбасы, еңбек және әлеуметтік қорғау істері жөніндегі министрі Тилеуханы Аубакир, Моңғолия Парламентінің депутаты және Қазақстан-Моңғолия парламентаралық достық тобы төрағасының орынбасары Хажекберийн Жангабыл, сондай-ақ Парламент депутаты Сархадын Зулпхар қатысты. Бұл өз кезегінде тараптардың диалогты кеңейтуге деген жоғары мүдделілігін көрсетті.
Тараптар ауыл шаруашылығы, көлік және логистика, жеңіл өнеркәсіп, туризм, білім беру және мәдениет салаларындағы ынтымақтастықтың ағымдағы жай-күйі мен перспективаларын егжей-тегжейлі талқылады. Сонымен қатар екі ел арасындағы тауар айналымын арттыру мүмкіндіктеріне ерекше назар аударылды.
Келіссөздер барысында салалық мемлекеттік органдар мен бизнес өкілдері арасындағы тікелей іскерлік байланыстарды кеңейту, өндірістік кооперацияны дамыту және бірлескен жобаларды іске асыру мәселелері басым бағыт ретінде белгіленді.
Сондай-ақ екіжақты қатынастарды нығайтуда және халықтар арасындағы байланыстарды тереңдетуде парламенттік достық топтарының маңызды рөл атқаратыны атап өтілді.
Кездесу қорытындысы бойынша тараптар 2026 жылы Астана қаласында Қазақстан-Моңғолия үкіметаралық комиссиясының 10-шы мерейтойлық отырысын өткізу туралы уағдаластыққа қол жеткізді. Бұл шара екі ел арасындағы серіктестікті жаңа деңгейге көтеруге мүмкіндік береді деп күтілуде.
