Қазақстандық Cybernet AI стартапы түркі тілдерін автоматты түрде тануға арналған (ASR) ең ірі жасанды интеллект моделін таныстырды. Бұл – Орталық Азияда алғаш рет жүзеге асқан осындай ауқымды жоба және ағылшын тілді шешімдерді бейімдеусіз, түркі тілдер тобының ерекшеліктері ескеріле отырып бастапқыдан әзірленген толыққанды AI-модель, деп хабарлайды DKNews.kz.
Жоба Astana Hub, Қазақстан Республикасының Жасанды интеллект және цифрлық даму министрлігінің стратегиялық қолдауымен және Microsoft компаниясының GPU-инфрақұрылымында іске асырылды.
Неге бұл маңызды
Осы уақытқа дейін Қазақстан мен Орталық Азия елдері негізінен ағылшын тіліне бағытталған халықаралық ASR-модельдерді қолдануға мәжбүр болды. Мұндай жүйелер түркі тілдеріне тән фонетиканы, акценттерді және күнделікті өмірде жиі кездесетін аралас сөйлеуді жеткілікті деңгейде түсіне алмады. Бұл банктер, байланыс орталықтары мен мемлекеттік қызметтердегі дауысқа негізделген сервистердің сапасын айтарлықтай шектеп келді.
Cybernet AI бұл мәселені түбегейлі басқа тәсілмен шешуді таңдады – компания өңірдің ішінде, өңір үшін арнайы модель жасап шықты.
Алты тіл және аралас сөйлеу
Жаңа ASR-модель:
- қазақ
- түрік
- өзбек
- қырғыз
- әзербайжан
- татар тілдерінің деректеріне негізделген
Сонымен қатар модель бизнесте және мемлекеттік қызмет көрсету кезінде кең таралған түркі-орыс аралас сөйлеуді де жоғары дәлдікпен таниды. Бұл – нақты өмірдегі диалогтарды ескеретін маңызды артықшылық.
Модель акценттерге, шуға және бір сөйлем ішінде тіл ауыстыруға төзімді, әрі финтехтен бастап мемлекеттік қызметтерге дейінгі әртүрлі салаларда бірдей жоғары нәтиже көрсетеді.
Қазақстан – тұтынушыдан әзірлеушіге
Astana Hub басқарушы директоры Таңат Өскембаевтың айтуынша, бұл жоба Қазақстан үшін стратегиялық маңызға ие.
«Cybernet AI әзірлемесі түркі тілдер тобына кіретін елдерге цифрлық сервистер мен клиенттерге қызмет көрсетуді ана тілінде, сапаны жоғалтпай және қолжетімді бағамен жасанды интеллект арқылы ауқымды түрде дамытуға мүмкіндік береді. Қазақстан үшін бұл жаһандық AI-шешімдерді тұтынушы рөлінен халықаралық деңгейде бәсекеге қабілетті өз технологияларын әзірлеуші елге айналу деген сөз».
Тірі тілді түсінетін AI
Cybernet AI компаниясының техникалық директоры Рашид Исмаилов модельдің басты ерекшелігі – оның табиғи сөйлеуді бастапқыдан түсіну қабілетінде екенін атап өтті.
«Біз ағылшын тілді модельдерді бейімдеуден саналы түрде бас тартып, тірі, аралас ауызекі сөйлеуді бірден түсінетін ASR-модель жасадық. Бұл жай ғана технологиялық өнім емес, Қазақстанда жасанды интеллекттің жергілікті экожүйесін және технологиялық егемендікті қалыптастыруға қосылған нақты үлес».
Кімдерге арналған
Жаңа модель үлкен көлемдегі дауыс коммуникацияларымен жұмыс істейтін ұйымдарға бағытталған:
- банктер мен қаржы ұйымдары
- телеком-операторлар
- байланыс орталықтары
- логистикалық және сервистік компаниялар
- халыққа қызмет көрсететін мемлекеттік құрылымдар
Әзірлеушілердің айтуынша, модель клиенттерге қызмет көрсету шығындарын азайтып, ең сұранысқа ие дауыс форматында тәулік бойы қолжетімді сервисті қамтамасыз етуге мүмкіндік береді.
Cybernet AI туралы
Cybernet AI – Astana Hub қатысушысы, банктер мен финтех-компанияларға, сондай-ақ реттелетін салаларға арналған қорғалған корпоративтік AI-шешімдерді әзірлеуге маманданған компания. Платформа жоғары өнімділікке, бақыланатын масштабтауға және қауіпсіздік талаптарын қатаң сақтай отырып операциялық шығындарды азайтуға бағытталған.
Компания Қазақстанда, Өзбекстанда, Қырғызстанда, АҚШ-та, Мексикада және Мысырда жұмыс істейді, сондай-ақ Ұлыбритания мен ЕО елдерінде жобалар жүзеге асыруда. Cybernet AI шешімдері 34 тілді, соның ішінде қазақ, өзбек, орыс, ағылшын, араб және испан тілдерін қолдайды.
Түркі әлемі үшін жаңа мүмкіндік
Сарапшылардың пікірінше, бұл ASR-модель түркі тілдеріне арналған дербес AI-нарықтың қалыптасуына жол ашуы мүмкін. Ал мұндай жобалар Қазақстанның жасанды интеллект саласындағы аймақтық ғана емес, жаһандық ойыншыға айналуына негіз болады.
