Бүгін Лондонда Bett Show UK 2026 білім беру технологияларының халықаралық көрмесі аясында Д.Серікбаев атындағы Шығыс Қазақстан техникалық университеті мен Лондон университеттік колледжінің (UCL) Археология институты арасында өзара түсіністік туралы меморандумға қол қойылды. UCL Археология институты археометаллургия және пәнаралық зерттеулер саласындағы әлемдегі жетекші ғылыми орталықтардың бірі саналады, деп хабарлайды DKNews.kz.
Құжатқа ШҚТУ ректоры Сәуле Рахметуллина мен UCL Археология институтының директоры Кевин Макдональд қол қойды. Келісім Қазақстан мен Ұлыбритания арасындағы ғылыми ынтымақтастықты жаңа деңгейге көтеруге бағытталған.
Екі жоба - бір ғылыми миссия
Меморандум аясында тараптар екі ірі ғылыми жобаны бірлесе дамытуға уағдаласты. Оның бірі - Еуропалық зерттеу кеңесінің (European Research Council, ERC) қолдауымен жүзеге асырылып жатқан DREAM халықаралық жобасы. Жоба UCL базасында археометаллургия саласындағы жетекші зерттеушілердің бірі Милана Радивоевичтің жетекшілігімен орындалып жатыр.
Екінші жоба - «Көне еуразиялық металлургия жүйесіндегі Шығыс Қазақстанның қола кен орындары» атты қазақстандық ғылыми бастама. Бұл жоба ҚР Ғылым және жоғары білім министрлігі Ғылым комитетінің қолдауымен ШҚТУ-да Евгений Водясовтың жетекшілігімен жүзеге асырылуда.
Екі жобаны да ортақ мақсат біріктіреді. Ол - Еуразия даласының көне металлургияның дамуына қосқан үлесін, қола дәуіріндегі технологиялық жаңашылдықтарды және трансөңірлік сауда желілерінің қалыптасуын кешенді түрде зерттеу.
Далалық зерттеулерден халықаралық жарияланымдарға дейін
Қол қойылған меморандум бірлескен далалық және зертханалық зерттеулер жүргізуді, халықаралық ғылыми жарияланымдар дайындауды, зерттеушілер арасында тәжірибе алмасуды және ғылыми іс-шаралар ұйымдастыруды көздейді.
Серіктестік шеңберінде археометаллургияны дамытуға ерекше басымдық беріледі. Бұл бағыт қазіргі археологиядағы ең қарқынды дамып келе жатқан салалардың бірі болып саналады және тарих, химия, материалтану мен цифрлық технологияларды біріктіреді.
Қазақстан ғылымы жаһандық кеңістікке шығып жатыр
ҚР Ғылым және жоғары білім министрлігі бұл келісімді халықаралық ғылыми әріптестікті нығайтуға және қазақстандық зерттеулерді жаһандық ғылыми кеңістікке интеграциялауға бағытталған маңызды қадам ретінде бағалап отыр.
Сарапшылардың пікірінше, мұндай әріптестіктер Қазақстанның ғылыми әлеуетін арттырып қана қоймай, жас ғалымдарға халықаралық жобаларға қатысуға, заманауи әдістерді меңгеруге және елдің ғылыми беделін күшейтуге мүмкіндік береді.
Лондонда қол қойылған меморандум Қазақстан ғылымының әлемдік зерттеу күн тәртібіне сенімді түрде еніп келе жатқанын көрсететін маңызды оқиға болды.
