Алматыда 1945 жылы КСРО-ның милитаристік Жапонияға қарсы соғысына қатысқан қазақстандықтарға арналған бірегей тарихи альбом дайындалып жатыр. Бастаманы «Бір белдеу – бір жол» сараптамалық клубы көтеріп, ел азаматтарын отбасылық архивтерде сақталған құнды деректермен бөлісуге шақырды, деп хабарлайды DKNews.kz.
Жоба аясында майдангерлерге қатысты фотосуреттер, өмірбаяндық мәліметтер, әскери қызмет жолы, марапаттар мен естеліктер жинақталады. Осы материалдардың негізінде «1945 жылғы КСРО-ның Жапонияға қарсы соғысына қатысқан қазақстандықтар» атты альбом жарық көреді.
Ұйымдастырушылардың айтуынша, ұсынылған барлық құжаттар тек альбомды дайындау мақсатында пайдаланылады және кейін иелеріне қайтарылады. Сонымен қатар, жобаға үлес қосқан әрбір қатысушыға басылымның тегін данасы табысталады.
Бұл бастама – ғылыми жоба ғана емес, тарихи жадты сақтауға бағытталған маңызды қадам. Өйткені соғыс тарихының көптеген белгісіз беттері дәл осындай отбасылық архивтерде, ұрпақтан-ұрпаққа жеткен естеліктерде сақталған.
Ұйымдастырушылардың айтуынша, бүгінгі үлес – ертеңгі ұрпаққа қалатын ортақ тарих. Сондықтан әрбір дерек, әрбір фотосурет – ел жады үшін баға жетпес құндылық.
Материалдарды мына мекенжайға жолдауға болады: «Бір белдеу – бір жол» сараптамалық клубы, Қазақстан-Неміс университеті, 050010, Алматы қаласы, Назарбаев даңғылы, 173.
Қосымша ақпаратты «Бір белдеу – бір жол» сараптамалық клубының менеджері Кильмакаева К.М.-нан (kilmakayeva@dku.kz) алуға болады.
