Алматы қаласында ҚР ҰҚК Шекара академиясының оқу орталығы базасында авиациялық қауіпсіздік саласындағы инсайдерлік тәуекелдер мен персоналдың саналы мінез-құлқын басқаруға арналған семинар өтті. Іс-шара АҚШ Елшілігінің Экспорттық бақылау және шекара қауіпсіздігі бағдарламасының (EXBS) қолдауымен және АҚШ Көлік қауіпсіздігі әкімшілігімен (TSA) серіктестікте ұйымдастырылды, деп хабарлайды DKNews.kz.
Семинардың басты ерекшелігі – техникалық құралдардан гөрі адам факторына басымдық берілуі. Қатысушылар азаматтық авиация қауіпсіздігіне тікелей әсер етуі мүмкін ішкі қатерлерді алдын ала анықтау, бағалау және азайтуға бағытталған практикалық тәсілдермен танысты.
Іс-шараға ҚР Көлік министрлігінің Азаматтық авиация комитеті, Қазақстанның авиациялық әкімшілігі, елдің жетекші әуежайлары, ҚР Қаржы министрлігінің Мемлекеттік кірістер комитеті, сондай-ақ ҚР ҰҚК Шекара академиясының өкілдері қатысты. Ерекше назар әуе жүктерінің қауіпсіздігіне, ықтимал тәуекелдер жағдайында әрекет етудің кешенді жоспарларын әзірлеуге аударылды.
Оқыту АҚШ Көлік қауіпсіздігі әкімшілігінің оқу орталығының нұсқаушыларының жетекшілігімен өтті. Бұл семинар Қазақстанда алғаш рет TSA-ның халықаралық тәжірибесі мен үздік практикаларын ұлттық авиациялық қауіпсіздік жүйесіне бейімдеуге бағытталған форматта ұйымдастырылды.
Мамандардың айтуынша, мұндай бастамалар кадрлық әлеуетті күшейтуге, тәуекелдерді басқаруда жүйелі көзқарас қалыптастыруға және саланың тұрақты дамуына жол ашады. Алдағы уақытта, соның ішінде АҚШ-қа тікелей әуе рейстерін ашу жоспарларын ескере отырып, бірлескен оқыту бағдарламаларын жалғастыру көзделіп отыр.
Бұл қадам Қазақстанның авиациялық қауіпсіздік жүйесін халықаралық стандарттарға жақындатып, саладағы кәсіби деңгей мен сенімділікті арттыруға бағытталған.
