Қазақстан мен Армения стратегиялық әріптестікті нақты істермен нығайтуға көшіп жатыр. Қазақстанның Армениядағы Елшісі Болат Иманбаев Армения Республикасының Вице-премьері, Қазақстан-Армения үкіметаралық экономикалық ынтымақтастық жөніндегі комиссиясының тең төрағасы Мгер Григорянмен кездесу өткізді, деп хабарлайды DKNews.kz.
Кездесу барысында тараптар соңғы жылдары сенімге, өзара құрмет пен прагматизмге негізделген екіжақты қатынастардың серпінді дамып келе жатқанын атап өтті. Әсіресе, 2025 жылы Қазақстан мен Армения арасындағы қарым-қатынастың стратегиялық әріптестік деңгейіне көтерілуі екі ел үшін жаңа мүмкіндіктерге жол ашқаны айтылды. Бұл формат ынтымақтастықты тек екіжақты деңгейде ғана емес, халықаралық ұйымдар аясында да тереңдетуге берік негіз қалыптастырады.
Сұхбатта Армения Премьер-министрі Никол Пашинянның Қазақстанға жасаған ресми сапарының қорытындыларына ерекше назар аударылды. Тараптар сол сапар аясында қол жеткізілген келісімдерді іске асыру бойынша алдағы нақты қадамдар мен практикалық шараларды талқылады. Сонымен қатар, Қазақстан-Армения үкіметаралық экономикалық ынтымақтастық жөніндегі комиссиясының 11-отырысының шешімдері қалай орындалып жатқаны жөнінде пікір алмасты.
Ағымдағы жылға арналған екіжақты күн тәртібінің басым бағыттары да назардан тыс қалған жоқ. Атап айтқанда, өзара тауар айналымын ұлғайту, инвестициялық белсенділікті арттыру, өнеркәсіптік және технологиялық кооперацияны кеңейту мәселелері көтерілді. Бұдан бөлек, ауыл шаруашылығы мен цифрлық экономика салаларындағы бірлескен жобаларды дамытуға ерекше мән берілді. Бұл бағыттарда нақты нәтижеге қол жеткізу басты мақсат ретінде белгіленді.
Кездесу барысында бірлескен үкіметаралық комиссияның рөлі де жоғары бағаланды. Тараптардың пікірінше, дәл осы алаң екі ел арасындағы практикалық өзара іс-қимылды тиімді үйлестіруге және өзекті мәселелер бойынша ортақ шешімдер қабылдауға мүмкіндік береді.
Кездесу қорытындысында Қазақстан мен Армения арасындағы достық байланыстарды жүйелі түрде дамытуға және экономикалық әріптестікті жаңа деңгейге шығаруға бағытталған бірлескен жұмысты жандандыруға өзара дайындық расталды.
