Қытайдың Сиань қаласында «Айцзю» компаниясының базасында үшінші мәрте «Жаңа жылдық тауарлар» фестивалі ұйымдастырылды. Қытайдың жаңа жыл мерекесі қарсаңында Солтүстік Қазақстан облысынан 40 футтік 10 контейнерге тиелген отандық азық-түлік өнімдері Сианьға жеткізілді. Іс-шара қазақстандық өнімдерді Қытай нарығында ілгерілетуге арналған маңызды алаңға айналды, деп хабарлайды DKNews.kz.
Бизнес, билік және қоғам өкілдері бір алаңда
Фестивальдің ашылу салтанатына Шэньси провинциясы мен Сиань қаласы әкімшілігінің өкілдері, кеден және эпидемиология қызметтері, сертификаттау және стандарттау органдары, ірі ретейл компаниялар, қоғамдық ұйымдар мен шетелдік дипломатиялық миссиялар қатысты. Сондай-ақ Қазақстан мен Орталық Азия елдерінің студенттік бірлестіктері, жергілікті блогерлер мен бұқаралық ақпарат құралдары шақырылып, шара кеңінен насихатталды.
Қазақстан-Қытай ынтымақтастығының жаңа мүмкіндіктері
Қазақстанның Сиань қаласындағы Бас консулы Жошыхан Қыраубаев фестиваль барысында Қазақстан мен Қытай арасындағы сауда-экономикалық, ауыл шаруашылығы, көлік және инвестициялық ынтымақтастықтың негізгі бағыттарына тоқталды. Ол шетелдік инвесторлар мен отандық өнім өндірушілер үшін Қазақстан Үкіметі ұсынып отырған заңнамалық кепілдіктер туралы, сондай-ақ ҚР Сыртқы істер министрлігі тарапынан көрсетілетін қолдау шараларын кеңінен таныстырды.
Бас консулдың айтуынша, жыл сайын өтетін бұл фестиваль екі ел арасындағы сауда-экономикалық және мәдени байланыстарды нығайтуда маңызды рөл атқарып келеді. Әлемде экологиялық таза азық-түлікке деген сұраныс артып отырғанын ескере отырып, ол Шэньси провинциясындағы тамақ өнімдерін өндіру, өңдеу және сату саласындағы кәсіпорындарды Қазақстанның инвестициялық мүмкіндіктерін зерделеуге шақырды.
Логистика және көтерме сауда орталығы
Іс-шара барысында Сиань қаласында қазақстандық өнімдерге арналған көтерме сауда орталығын құру бастамасы да көтерілді. Бұл жоба Қазақстан Президенті Қасым-Жомарт Тоқаевтың бастамасымен жүзеге асқан Қазақстан-Қытай халықаралық логистикалық құрғақ порттың мүмкіндіктерін пайдалануды көздейді.
Аталған логистикалық орталық толық жабдықталған және қазақстандық өнім өндірушілерге сақтау, тасымалдау және экспорттық сүйемелдеу бойынша кешенді қызмет көрсетуге дайын екені атап өтілді.
AiJu қолдауы және апталық көрмелер
Қытайлық «AiJu» инвестициялық компаниясының басшылығы қазақстандық тауарлар ассортиментін кеңейтуге және отандық өндірушілерге жан-жақты қолдау көрсетуге дайын екенін мәлімдеді. Сонымен қатар Бас консулдықтың қазақстандық шағын және орта бизнес өнімдерінің экспорттық рұқсат құжаттарын рәсімдеуде әкімшілік қолдау көрсетіп отырғаны оң бағаланды.
Форум қорытындысы бойынша Бас консулдықтың ұсынысымен «Айцзю» компаниясы Сиань қаласындағы ірі сауда орталықтарында қазақстандық тауарлардың апталық көрмелерін өткізу туралы уағдаластыққа қол жеткізді.
Сиань - Қытай нарығына шығатын қақпа
Сиань - ежелгі Жібек жолының бастауы әрі қазіргі Қытай-Еуропа теміржол қатынасының негізгі торабы. Бұл қала арқылы қазақстандық азық-түлік өнімдері, Қытайға қажетті минералды ресурстар және басқа да жоғары сапалы тауарлардың Қытай нарығына тереңірек енуіне қосымша мүмкіндіктер ашылып отыр.
