Қазақстан мен Таиланд арасындағы қарым-қатынас жаңа, неғұрлым практикалық деңгейге көтеріліп келеді. Бангкокта Қазақстанның Таиландтағы Елшісі Марғұлан Баймұхан мен Бангкок қаласының Губернаторы Чадчарт Ситтипунттің кездесуі өтті. Кездесудің басты өзегі – мемлекетаралық диалогпен шектелмей, қалалар, өңірлер және іскерлік орта арасындағы тікелей байланыстарды дамыту, деп хабарлайды DKNews.kz.
Тараптар Қазақстан мен Таиланд арасындағы екіжақты ынтымақтастықтың келешегін, сондай-ақ Бангкок пен Қазақстан өңірлері арасындағы өзара іс-қимылды кеңейту мүмкіндіктерін талқылады. Әңгіме барысында нақты жобаларға, инвестиция мен кәсіпкерлікке бағытталған бастамаларға басымдық берілді.
Туризмнен «ақылды қалаға» дейін
Кездесуде туризм, қалалық инфрақұрылым, тұрақты даму, «ақылды қала» шешімдерін енгізу, логистика және қалалық қызметтерді цифрландыру салаларындағы ынтымақтастық мүмкіндіктері кеңінен сөз болды. Бұл бағыттар бүгінде мегаполистер үшін ғана емес, өңірлік дамудың да негізгі драйверіне айналып отыр.
Инвестициялық тартымдылықты арттыруға және кәсіпкерлікті дамытуға бағытталған бірлескен жобаларды іске асыруға екі тараптың да қызығушылық танытып отырғаны атап өтілді. Әсіресе бизнес пен муниципалдық құрылымдар арасындағы тікелей өзара байланыстарды жолға қою мәселесі күн тәртібіне шықты.
Қазақстан реформалар мен даму бағытын таныстырды
Кездесу барысында қазақ дипломаты Қазақстанның әлеуметтік-экономикалық дамуының негізгі бағыттары туралы ақпарат берді. Сондай-ақ Мемлекет басшысы Қасым-Жомарт Тоқаевтың бастамасымен жүзеге асырылып жатқан конституциялық реформаларға тоқталды.
Марғұлан Баймұхан Қазақстанның көпвекторлы және прагматикалық сыртқы саясатты ұстанатынын, сондай-ақ Таиландпен жан-жақты және ұзақмерзімді ынтымақтастықты кеңейтуге дайын екенін атап өтті.
Бангкоктың өңірлерге қызығушылығы
Бангкок губернаторы Астана және Қазақстанның басқа да өңірлерімен байланыстарды жандандыруға мүдделі екенін білдірді. Ол Бангкоктың өңірдегі жетекші экономикалық, қаржылық және туристік орталықтардың бірі ретіндегі әлеуетіне назар аударды.
Сонымен қатар қалалық басқару, цифрландыру, жасанды интеллект, тұрақты даму және инфрақұрылымды жаңғырту салаларында тәжірибе алмасудың маңыздылығы ерекше атап өтілді. Бұл бағыттарда Бангкоктың жинақтаған тәжірибесі Қазақстан қалалары үшін де қызықты болуы мүмкін.
Диалог жалғасады
Кездесу қорытындысында тараптар тұрақты байланыстарды қолдауға және екі елдің қалалары мен өңірлері арасындағы жергілікті өзін-өзі басқару органдары, іскерлік топтар мен сарапшылар деңгейінде тікелей байланыстар орнатуға дайын екенін растады.
Алдағы уақытта нақты бастамалар мен жобаларды пысықтау, Қазақстанның сауда-экономикалық және инвестициялық мүмкіндіктерін таныстыру шараларын ұйымдастыру, сондай-ақ өзара сапарлар өткізу жөнінде уағдаластыққа қол жеткізілді.
Әлем назарындағы мегаполис
Бүгінде Бангкок қаласының өзінде 10–11 млн адам тұрады, ал Үлкен Бангкок агломерациясында халық саны 16–17 млн-нан асады. Бұл Таиландтың ең ірі экономикалық және мәдени орталығы ғана емес, әлемдегі ең көп баратын қалалардың бірі.
Халықаралық туристік рейтингтерге сәйкес, Бангкок соңғы жылдары халықаралық туристер саны бойынша әлемде алдыңғы орындарды иеленіп келеді. Қала жыл сайын шамамен 35 млн шетелдік туристі қабылдайды.
Осындай ауқымды мегаполистің Қазақстанмен серіктестікке қызығушылық танытуы – өңірлер, бизнес және қалалық даму үшін жаңа мүмкіндіктер ашатыны анық.
