Дубай әлемді таңғалдыруды әлдеқашан әдетке айналдырған. Алайда Ciel Dubai Marina қонақүйінің ашылуы бұл жолы да қаланың амбициясын жаңа деңгейге шығарды. Әлемдегі ең биік қонақүй өз жұмысын дәстүрлі лентаны қиюмен емес, Dubai Marina үстіндегі аспанды үлкен сахнаға айналдырған әсерлі әуе шоуымен бастады, деп хабарлайды DKNews.kz.
XDubai және Дубайдың Экономика және туризм департаментімен бірлесіп ұйымдастырылған шара барысында биіктігі 377 метр болатын зәулім ғимарат Дубай тарихындағы ең ауқымды вингсьют-шоулардың бірінің орталығына айналды.
82 қабат арасынан өткен тарихи ұшу
Ашылу салтанатының шарықтау шегі – XDubai командасындағы бес вингсьют-спортшының топтық ұшуы болды. Басты атлет қонақүйдің орталық архитектуралық элементі саналатын «ине көзінен» ұшып өтіп, 82 қабатты саңылауды 200 км/сағ-тан жоғары жылдамдықпен еңсерді. Бұл трюк Дубайдың жаңа символдарының біріне айналуға толық негіз бар.
Қалған спортшылар қатаң формацияны сақтай отырып, қауіпсіздік талаптарына сай әзірленген түрлі-түсті түтін эффектілерін синхронды түрде қолданды. Аспанда қалған ашық іздер ғимараттың ауқымын айқындап, шоуға ерекше көркемдік берді.
Жерден көрінбейтін кадрлар
Ұшуды түсіру үшін жоғары жылдамдықтағы аэросъёмкаға арнайы бейімделген FPV-дрон қолданылды. Бұл дрон вингсьют-спортшылардың ғимарат айналасындағы және үстіндегі қозғалысын кинематографиялық деңгейде көрсетуге мүмкіндік берді. Мұндай кадрлар Ciel Dubai Marina жобасының масштабы мен experiential luxury – әсерге негізделген премиум қонақжайлылық тұжырымдамасын айқын көрсетті.
«Дубай мүмкіндіктің шегін кеңейтуді жалғастырады»
Дубайдың Экономика және туризм департаменті басшысының орынбасары Аида Әл-Бусаиди жобаның маңызын ерекше атап өтті:
«Ciel Dubai Marina-ның ашылуы Дубайдың мүмкіндіктің шегін үздіксіз кеңейтуге ұмтылысын көрсетеді. Бұл жоба қала келбетінде әлемдегі ең биік қонақүй ретінде ғана емес, мемлекеттік және жеке сектордың бірлесіп қонақжайлылық индустриясының болашағын қалай қалыптастыра алатынының үлгісі ретінде де орын алды».
Қонақүй индустриясындағы жаңа бағдар
The First Group компаниясының бас директоры Роб Бёрнс ашылу форматының кездейсоқ таңдалмағанын айтты:
«XDubai және Дубайдың Экономика және туризм департаментімен бірге осы оқиғаның серіктесі болу – біз үшін үлкен мәртебе. XDubai командасы экстремалды ұшуды техникалық тұрғыда мінсіз әрі қауіпсіз орындады. Бұл ынтымақтастық инновация мен ерекше шешімдерге ұмтылудың нақты нәтижесін көрсетеді».
Ал Shamal холдингінің демалыс және ойын-сауық бағыты бойынша атқарушы вице-президенті Мохаммад Джавад Ciel Dubai Marina-ның қала дамуы үшін маңызын атап өтті:
«Дубай – амбиция мен инновация қаласы. Ciel Dubai Marina-ның пайда болуы қалалық кеңістіктің дамуындағы маңызды кезең болды. Вингсьют-спортшылардың қатысуы ғимарат архитектурасын мүлде жаңа қырынан танытуға мүмкіндік берді».
Ciel Dubai Marina не ұсынады
Ciel – тек биіктік рекорды емес. Қонақүйде 1 004 номер мен люкс, панорамалық терезелер арқылы Парсы шығанағы мен қаланың көрінісі ашылады. Негізгі ерекшеліктері:
- әлемдегі ең биік инфинити-бассейн;
- спа-орталық (ашылуы 2026 жылдың сәуіріне жоспарланған);
- 61-қабаттағы фитнес-зал;
- Пальма Джумейра аралындағы Soluna жағажай клубына эксклюзивті қолжетімділік.
Гастрономиялық бағытта сегіз түрлі мейрамхана мен бар жұмыс істейді – Жерорта теңізі асханасынан бастап, заманауи азиялық форматтар мен халықаралық деңгейдегі брендтерге дейін.
Әсермен басталған жаңа символ
Жобаны The First Group Real Estate жүзеге асырып, басқаруды The First Group Hospitality компаниясы IHG тобының Vignette Collection құрамында жүргізеді. Ciel Dubai Marina бутик-қонақүйдің дара стилін халықаралық қонақүй желісінің тәжірибесімен ұштастырған.
Аспандағы шоу бұл тек ашылу рәсімі емес, Дубайдың тағы бір мәлімдемесі болды. Ciel Dubai Marina бірден-ақ әлемдік деңгейдегі жаңа символ ретінде танылып, архитектура, технология және креативтің тоғысында туған жобалардың қалай іске асатынын көрсетті.
