Астанада Сыртқы істер министрлігінің бастамасымен дипломатиялық корпус үшін Жаңа Конституция жобасына арналған брифинг өтті. Іс-шара Конституциялық реформа жөніндегі комиссия жұмысының қорытындылары бойынша ұйымдастырылды, деп хабарлайды DKNews.kz.
Брифингке халықаралық өкілдер қатысты
Кездесуге Қазақстанда аккредиттелген:
- дипломатиялық корпус өкілдері
- халықаралық ұйымдар мүшелері
- сарапшылар
қатысты. Жалпы іс-шараға шамамен 80 адам жиналды.
Комиссия мүшелері негізгі жаңалықтарды таныстырды
Брифингке Конституциялық Сот төрағасы, комиссия жетекшісі Эльвира Азимова және комиссия мүшелері қатысты. Олардың қатарында:
- Әділет министрі Ерлан Сәрсембаев
- Конституциялық Сот төрағасының орынбасары Бақыт Нұрмұханов
- Адам құқықтары жөніндегі уәкіл Артур Ластаев
- Сыртқы істер министрінің орынбасары Ақан Исетов
- Республикалық адвокаттар алқасының төрағасы Мұрат Мырзағараев
болды.
Комиссия мүшелері Конституция жобасының басты жаңалықтары мен реформаның тұжырымдамалық негіздерін түсіндірді.
Егемендік пен аумақтық тұтастық сақталады
Эльвира Азимова Конституция жобасында мемлекеттің негізгі қағидаттары өзгеріссіз қалатынын атап өтті.
«Конституция жобасында Қазақстан Республикасының егемендігі, тәуелсіздігі, унитарлығы және аумақтық тұтастығы өзгеріссіз қалады. Конституцияға өзгерістер тек жалпыұлттық референдум нәтижелері бойынша енгізіледі. 2026 жылғы 15 наурыздағы республикалық референдум қазақстандықтардың елдің одан әрі даму жолын айқындайтын жауапты таңдау күні болады».
Билік құрылымындағы жаңа модель
Жоба биліктің теңгерімді әрі есеп беретін моделін қалыптастыруды көздейді.
Негізгі ұсыныстар:
- бір палаталы Құрылтайға көшу
- азаматтардың өкілді органы ретінде Халық Кеңесін құру
- заң шығару бастамасы құқығын бекіту
Халық Кеңесінің қызмет тәртібі жеке конституциялық заңмен реттелмек.
Сыртқы саясаттағы құқықтық қағидаттар
Брифингте Конституция жобасының сыртқы саясатқа қатысты нормалары да түсіндірілді.
Сыртқы істер министрінің орынбасары Ақан Исетов:
«Конституциялық жаңашылдықтар мемлекетіміздің халықаралық құқықтың іргелі қағидаттарына және ел дамуының жаңа кезеңіне көшу жағдайындағы ұлттық басымдықтарға берік бейілділігін жан-жақты көрсетеді. Қазақстан Республикасының халықаралық ынтымақтастық моделінің негізіне БҰҰ Жарғысының негізгі қағидаттары және қабылданған барлық халықаралық міндеттемелерді адал орындау қағидаты қаланған».
Сонымен қатар халықаралық шарттар Қазақстанның құқықтық жүйесінің ажырамас бөлігі болып қала беретіні атап өтілді.
Реформалардың ашықтығы атап өтілді
Кездесу қорытындысында дипломатиялық корпус пен халықаралық ұйымдар өкілдері Қазақстандағы конституциялық реформалардың:
- ашық жүргізіліп жатқанын
- түсіндіру жұмыстарының жоғары деңгейде ұйымдастырылғанын
- құқықтық айқындық қамтамасыз етілгенін
атап өтті.
