Қазақстанның Беларусьтегі Елшісі Тимур Жақсылықов Беларусь Республикасының Ақпарат министрі Марат Марковпен кездесу өткізді, деп хабарлайды DKNews.kz.
Кездесу барысында тараптар екі ел арасындағы саяси диалогтың жоғары деңгейін атап өтіп, сауда-экономикалық және мәдени-гуманитарлық байланыстардың табысты дамып келе жатқанын айтты. Сонымен қатар ақпараттық саладағы қазақ-белорус ынтымақтастығының қазіргі жағдайы мен болашақтағы мүмкіндіктері талқыланды.
Қазақстандағы референдум туралы ақпарат берілді
Кездесу барысында елші Тимур Жақсылықов Беларусь тарабына Қазақстанда 15 наурыз күні жаңа Конституция жобасы бойынша республикалық референдум өтетінін хабарлады.
Қазақ дипломаты Ата заң жобасының негізгі ережелері мен жаңашылдықтарын таныстырып, ұсынылып отырған конституциялық реформа Қазақстан Президенті Қасым-Жомарт Тоқаев жүргізіп отырған саяси жаңғырудың қисынды жалғасы екенін атап өтті.
Беларусь Қазақстандағы реформаларды жоғары бағалады
Беларусь Республикасының Ақпарат министрі Марат Марков Қазақстанда жүргізіліп жатқан саяси, әлеуметтік-экономикалық және мәдени реформаларды жоғары бағалады.
Оның айтуынша, бұл өзгерістер елдің тұрақты және серпінді дамуын қамтамасыз етуге ықпал етіп отыр.
Ақпараттық саладағы ынтымақтастық күшейтіледі
Кездесу қорытындысы бойынша тараптар ақпараттық саладағы екіжақты ынтымақтастықты одан әрі дамытуға және өзара іс-қимылды жандандыруға дайын екендерін растады.
