Экспорт туралы айтқанда, әдетте шикізат, технология немесе өнеркәсіптік өнім еске түседі. Бірақ Тимур Турловтың бұл мәселеге көзқарасы бөлек. Freedom Holding Corp. басшысы шетелдік нарықтарға жеке бір сервисті емес, компания Қазақстанның ішінде он жылға жуық уақыт бойы қалыптастырған тұтас цифрлық жүйені шығаруды көздеп отыр.
Freedom Түркияда өз инфрақұрылымын дамытуды жоспарлап отыр. Бұл елде шамамен 86 миллион адам тұрады. Холдинг үшін бұл картадағы тағы бір кеңсені ашу ғана емес. Компания Түркияға банк қызметтері, инвестициялар, сақтандыру және күнделікті өмірге арналған цифрлық сервистер біріктірілген модельді алып бармақ.
Неліктен нарық тек халық санымен өлшенбейді
Freedom үшін Түркия нарығы Қазақстаннан тыс жерде цифрлық модельді кеңейтудің өзіндік сынақ алаңы ретінде қарастырылады. Компания елде Freedom Yatirim брокерлік құрылымы арқылы орныға бастады. Келесі қадам Turkish Bank-тің бақылау пакетін — 99,32 пайыз акциясын сатып алу туралы келісім болды.
Мұндай конфигурация қаржы нарығының бірден екі сегментіне жол ашады: инвестициялық қызметтерге және клиенттерге банктік қызмет көрсетуге.
Freedom-ның халықаралық экспансиясы көптеген бәсекелестермен салыстырғанда кері сценарий бойынша дамып келе жатқаны қызық. Әдетте компаниялар алдымен шетелдегі қатысуын кеңейтеді, содан кейін ғана экожүйе құрады. Ал бұл жағдайда экожүйе географиялық кеңеюден бұрын пайда болды.
Компания өзінің басты активі деп нені санайды
Компанияның қаржылық көрсеткіштері әсерлі көрінеді. 2026 жылғы 31 наурызда аяқталған қаржы жылының қорытындысы бойынша Freedom Holding Corp. кірісі 2,19 миллиард долларға жетті. Таза пайда бір жыл бұрынғы 76,2 миллион доллардан 153,3 миллион долларға дейін өсті. Активтер көлемі 13 миллиард доллардан асты. Nasdaq-қа шыққан сәттен бері компанияның кірісі 26 еседен астам артқан.
Алайда бұдан да қызығы — басқа көрсеткіш. Банк сегментіндегі клиенттер саны бір жыл ішінде 2,5 миллионнан 5 миллионнан астам адамға дейін өсті. Брокерлік бағыттағы аудитория 858 мың клиентке жетті. Бұл бизнестің ауқымын ғана емес, экожүйе ішіндегі цифрлық сервистердің қаншалықты жылдам таралып жатқанын да көрсетеді.
SuperApp өсімнің негізіне айналды
Бұл құрылымның ортасында Freedom SuperApp тұр. Бүгінде оның пайдаланушылары 5 миллион адамнан асады. Бір қосымша арқылы клиент инвестицияларға, банк өнімдеріне, сақтандыруға, билет сатып алуға және басқа да қызметтерге қол жеткізе алады. Компания басшылығы мұндай модель Қазақстаннан тыс нарықтарда да жұмыс істей алады деп есептейді.
Халықаралық нарықтарда Freedom енді классикалық банктермен ғана бәсекелеспейді. Оның қарсыластары — пайдаланушыны өз экожүйесінің ішінде мүмкіндігінше ұзақ ұстауға ұмтылатын ірі цифрлық платформалар.
Стамбұлдан Еуропаға дейін
Түркия бағыты — әлдеқайда ауқымды маршруттың бір бөлігі ғана. Компания Францияда банк лицензиясын алуға өтінім берді және Еуропалық одақ аумағында қаржылық сервистерді дамытуды көздеп отыр. Еуропалық жобаға 500 миллион еуро инвестиция салу жоспарланған, ал алғашқы үш жылдағы мақсатты аудитория 50 миллион клиент деп бағаланып отыр.
Сонымен қатар холдинг Азиядағы қатысуын кеңейтуде. Компанияның қызығушылық аймағында Жапония, Моңғолия, Пәкістан, Грузия және Армения бар. АҚШ-та цифрлық сервистерді одан әрі дамыту мүмкіндіктері де қарастырылып жатыр.
Бірнеше жыл бұрын Freedom Қазақстаннан шыққан қарқынды дамып келе жатқан қаржы компаниясы ретінде қабылданатын. Қазір оның ауқымы басқаша көрінеді. Әңгіме жергілікті цифрлық модельді бірнеше құрлықта бірдей бәсекеге түсе алатын халықаралық өнімге айналдыру туралы болып отыр. Түркия осы идеяны осындай көлемдегі нарықта алғаш сынайтын алаңға айналады. Бірақ бұл соңғысы болмайтыны анық.
