Визасыз кіру цифрлық форматқа көшірілмек.
Визасыз режим қолданылатын елдердің азаматтарына Қазақстанға сапар алдында электрондық ETA рұқсатын алу қажет болуы мүмкін. ІІМ әзірлеген түзетулер 2026 жылғы 17 тамызға дейін ашық талқыланады, деп хабарлайды DKNews.kz.
Құжат әлі бекітілген жоқ. Сондықтан талаптар, төлем мөлшері және рұқсат алуға міндетті саяхатшылар тізімі өзгеруі мүмкін.
ETA — виза емес
Электрондық рұқсат визасыз режимді жоймайды және визаны алмастырмайды. ETA — саяхатшы Қазақстанға келмей тұрып рәсімдейтін жеке цифрлық рұқсат.
Турист үшін бұл сапар алдындағы тағы бір рәсім болмақ. Мемлекет осы жүйе арқылы елге кіретін адам туралы мәліметті алдын ала тексеріп, көші-қон ағынын нақты есепке алуды көздейді.
Жаңа талапты алдымен Қазақстанға визасыз кіре алатын мемлекеттердің азаматтарына қолдану жоспарланып отыр. Өтініш берушілердің нақты тізімін Үкімет кейінірек анықтайды.
Рұқсатты рәсімдеу ақылы болады
Жоба ETA алу үшін төлем енгізуді қарастырады, алайда тарифтер әзірге белгіленген жоқ. Алым мөлшерін Үкімет жеке шешіммен бекітуі тиіс.
Төлем шекарадан өткені үшін емес, электрондық рұқсатты рәсімдеу үшін алынады. Сондықтан Қазақстан барлық шетелдік үшін ақылы кіру тәртібін енгізеді деуге әлі ерте.
Дипломатиялық және қызметтік паспорт иелері, ресми делегация мүшелері, сондай-ақ Қазақстанда аккредиттелген дипломатиялық корпус өкілдері ETA алудан босатылады.
Өтінішті 72 сағат бұрын беру керек
Мемлекеттік QazETA платформасы пилоттық режимде жұмыс істеп тұр. Ол арқылы шетелдіктер электрондық виза, ETA, электрондық резиденттік және шекарадан өткені туралы анықтама ала алады.
ETA өтінімін мобильді қосымша арқылы сапарға дейін кемінде 72 сағат бұрын беру қажет. Рұқсаттың жарамдылық мерзімі — 180 күн.
Алайда ETA-ның жарамдылық мерзімі шетелдіктің Қазақстанда қанша уақыт бола алатынын анықтамайды. Елде болу мерзімін қолданыстағы көші-қон заңнамасы реттейді.
Пилоттық кезеңде визасыз елдердің азаматтары үшін ETA алу ұсынымдық сипатта болады. Пилот аяқталғаннан кейін рұқсатты міндетті түрде алу талабы кезең-кезеңімен енгізіледі, делінген QazETA туралы ресми ақпаратта.
ETA Қазақстанға кіруге кепілдік бермейді
Қолданыстағы электрондық рұқсаттың өзі шекарадан автоматты түрде өту құқығын бермейді. Соңғы шешімді шекаралық бақылау қабылдайды.
«Сонымен бірге, берілген ETA Қазақстан Республикасының аумағына кіруге кепілдік бермейді. Елге кіру туралы түпкілікті шешім шекаралық бақылаудан өту кезінде Қазақстан Республикасының уәкілетті мемлекеттік органы тарапынан қабылданады».
Шекарашылар заңнамада көзделген негіздерді анықтаса, елге кіргізбеуі мүмкін. ETA сапардың алдын ала цифрлық тексеруден өткенін ғана растайды.
Жаңа тәртіпті 2026 жылдың соңына дейін енгізбек
ІІМ жүйені 2026 жылғы тамыздан желтоқсанға дейін кезең-кезеңімен іске қосуды ұсынады. Бұл уақыт QazETA жүйесін реттеуге және шекара инфрақұрылымын жаңа тәртіпке бейімдеуге қажет.
Әзірге бұл — қолданыстағы талап емес, талқылауға шығарылған жоба. Құжат бекітілгенге дейін өтініш берушілер санаты, рәсімдеу тәртібі мен төлем мөлшері өзгеруі мүмкін.
