Қазақстанның құрылыс саласы жаңа технологиялық кезеңге аяқ басты.
Енді жасанды интеллект тек мәтін жазатын немесе сурет салатын құрал емес. Ол ғимараттардың техникалық жағдайын бақылап, құрылыс құжаттарын бірнеше секундта саралап, инженерлік шешімдердің тиімділігін болжайтын технологияға айналып келеді, деп хабарлайды DKNews.kz.
Осы бағыттағы маңызды мәселелер «ҚазҚСҒЗИ» АҚ мен халықаралық SiriusOne IT-компаниясының кездесуінде талқыланды. Тараптар жасанды интеллекті құрылыс саласына енгізудің нақты тетіктері мен болашақтағы бірлескен жобаларды пысықтады.
Құрылыс саласы қалай өзгереді?
Кездесу барысында ең алдымен жасанды интеллекттің құрылыс компанияларының күнделікті жұмысын қалай жеңілдете алатыны сөз болды.
Мамандардың айтуынша, AI технологиялары:
- нормативтік-техникалық құжаттарды жылдам талдауға;
- үлкен көлемдегі деректерді өңдеуге;
- бизнес-процестерді автоматтандыруға;
- тәуекелдерді алдын ала болжауға;
- басқарушылық шешімдердің дәлдігін арттыруға мүмкіндік береді.
Әсіресе predictive analytics немесе болжамды талдау технологиялары ерекше назар аударды. Мұндай жүйелер жобаның әр кезеңіндегі ықтимал қауіптерді алдын ала анықтап, уақыт пен қаржыны үнемдеуге көмектеседі.
Ақылды ғимараттар – енді болашақ емес
Кездесуде ғимараттарды пайдалану кезеңіндегі цифрлық технологияларға да басымдық берілді.
Сөз IoT датчиктері туралы болды. Мұндай құрылғылар арқылы:
- ғимараттың техникалық жағдайын үздіксіз бақылауға;
- қауіпсіздік деңгейін арттыруға;
- энергия тұтынуды тиімді басқаруға;
- пайдалану шығындарын азайтуға болады.
Яғни құрылыс аяқталғаннан кейін де нысанның «өмірі» цифрлық технологиялардың бақылауында болады.
Қазақстандағы BIM дамуы жаңа кезеңге өтті
«ҚазҚСҒЗИ» АҚ мамандары халықаралық әріптестерге елімізде құрылыс саласын цифрландыру бағытында атқарылып жатқан жұмыстарды таныстырды.
Олардың қатарында:
- құрылыс объектілерін ақпараттық модельдеу технологияларын (ТИМСО) енгізу;
- BIM технологияларын дамыту;
- халықаралық buildingSMART стандарттарын Қазақстанда енгізу;
- buildingSMART Kazakhstan ұйымының қызметі бар.
Бұл бағыттар жобалау, құрылыс және нысандарды пайдалану сапасын халықаралық деңгейге жақындатуды көздейді.
«Жасанды интеллект – енді болашақтың емес, бүгіннің құралы»
Кездесу барысында қатысушылар жасанды интеллекттің құрылыс индустриясындағы рөліне ерекше тоқталды.
«Бүгінде жасанды интеллект – болашағы зор технология ғана емес, құрылыс саласының тиімділігін арттыратын нақты құралға айналып отыр. Оны қолдану ақпаратты өңдеу үдерісін едәуір жеделдетуге, қабылданатын шешімдердің сапасын арттыруға және құрылыс саласының цифрлық экожүйесін дамытуға жаңа мүмкіндіктер ашуға мүмкіндік береді», – деп атап өтті кездесу қатысушылары.
Келесі қадам қандай?
Кездесу қорытындысында тараптар кәсіби ынтымақтастықты кеңейтуге ниет білдірді.
Әңгіме тек тәжірибе алмасумен шектелмейді. Болашақта Қазақстанның құрылыс саласына жасанды интеллект пен басқа да озық цифрлық технологияларды енгізуге бағытталған бірлескен жобаларды іске асыру жоспарланып отыр.
Сарапшылардың пікірінше, бұл құрылыс нарығының тиімділігін арттырып қана қоймай, саланың цифрлық трансформациясын жаңа деңгейге көтеруі мүмкін.
