Трамп Тоқаевқа арнайы сәлем жолдады.
АҚШ Президенті Қазақстан басшысымен қалыптасқан сенімді қарым-қатынасқа ризашылығын білдіріп, оны G20 саммитіне қатысу үшін Майамиде күтетінін жеткізген, деп хабарлайды DKNews.kz.
Бұл туралы 25 тамызда Қасым-Жомарт Тоқаевтың АҚШ Конгресі Өкілдер палатасының делегациясымен кездесуінде айтылды. Америкалық делегация құрамында Бюджет және салық жөніндегі комитет төрағасы Джейсон Смит және конгрессмендер Грег Мерфи, Кэрол Миллер, Ронни Джексон, Уэсли Белл мен Эдвард Кейс болды.
Трамп Джейсон Смитке түнгі екіде қоңырау шалған
Кездесудің назар аудартқан тұстарының бірі – Джейсон Смиттің Дональд Трамппен телефон арқылы сөйлескені туралы мәлімдемесі.
Конгрессменнің айтуынша, АҚШ Президенті оған Тоқаевпен кездесуге бірнеше сағат қалғанда қоңырау шалған.
«Бүгін түнгі екіде маған Президент Дональд Трамп қоңырау шалды. Мен оған бірнеше сағаттан соң Сізбен кездесетінімді айттым. Ол Сізге ізгі тілегін жолдап, араларыңызда қалыптасқан сенімді әрі конструктивті қарым-қатынасқа ризашылығын білдірді. Сонымен қатар Президент Сізді G20 саммитіне қатысу үшін Майамиде күтетінін айтты. Біздің сапарымыздың бір мақсаты – Америка Құрама Штаттары мен Қазақстан арасындағы экономикалық байланыстарды одан әрі кеңейту мүмкіндіктерін зерделеу. Біз екіжақты ынтымақтастықты нығайту жолында мазмұнды диалог өрбітуге бейілміз. Президентіміз бұған айрықша маңыз артып отыр», – деді Джейсон Смит.
Осылайша, АҚШ конгрессмендері сапарының экономикалық бағыты да нақты белгіленді. Делегация Қазақстан мен АҚШ арасындағы экономикалық байланысты одан әрі кеңейту мүмкіндіктерін зерделеуге келген.
Тоқаев Қазақстан мен АҚШ қатынасының деңгейін бағалады
Қасым-Жомарт Тоқаев екі ел арасындағы көпжақты серіктестіктің қарқынды дамып келе жатқанын айтты.
Басты бағыттардың қатарында сауда-экономикалық және инвестициялық ықпалдастық, озық технологиялар, ғылым, білім және мәдениет аталды.
Мемлекет басшысының айтуынша, Дональд Трамппен конструктивті әрі сенімді диалогтың арқасында Қазақстан мен АҚШ арасындағы қарым-қатынас бұрын-соңды болмаған деңгейге көтерілген.
Қазақстан мен АҚШ көпжақты форматтағы ынтымақтастықты да жалғастырып келеді. Кездесуде Бейбітшілік кеңесі мен Ибраһим келісімдері, сондай-ақ ядролық қауіпсіздік пен жаппай қырып-жою қаруын таратпау мәселелері қозғалды.
Құрылтай мен АҚШ Конгресі арасында диалог күшеймек
Америкалық делегацияның сапары бір палаталы Құрылтай сайлауынан кейін өтіп отыр.
Тоқаев бұл сәйкестіктің символдық мәніне назар аударып, парламент сайлауын Қазақстандағы саяси жаңғырудың жаңа кезеңін айшықтайтын тарихи оқиға деп атады.
Президенттің айтуынша, бір палаталы Құрылтай заң шығару үдерісінің тиімділігі мен заңдардың сапасын арттыруға бағытталған.
Жаңа орган қызметінің маңызды бағыттарының бірі парламенттік дипломатия болмақ.
«АҚШ Конгресі мен Құрылтай мүшелері арасындағы конструктивті әрі мазмұнды диалог өзара түсіністікті тереңдетіп, ортақ басымдықтарды ілгерілету және қазақ-америка серіктестігін нығайту тұрғысынан айрықша мәнге ие», – деді Президент.
АҚШ конгрессмендеріне жаңа Конституция таныстырылды
Қасым-Жомарт Тоқаев америкалық делегацияға Қазақстанда жүргізіліп жатқан саяси және әлеуметтік-экономикалық реформалар туралы мәлімет берді.
Сонымен бірге басқару жүйесін жаңғыртудың негізгі басымдықтарына тоқталды.
Президент Конгресс мүшелерін Қазақстанның жаңа Конституциясындағы негізгі аспектілермен таныстырып, оның жалпыхалықтық қолдауға ие болғанын атап өтті.
Кездесу екі бағытты алға шығарды: жаңа Құрылтай мен АҚШ Конгресі арасындағы парламенттік байланысты дамыту және экономикалық ынтымақтастықты кеңейту.
Келесі маңызды саяси байланыс Қасым-Жомарт Тоқаевтың Майамиге жоспарланған сапары болмақ. Мемлекет басшысы бұл сапар Қазақстан мен АҚШ арасындағы кеңейтілген стратегиялық серіктестікке тың серпін беретініне сенім білдірді.
