Сапар екіжақты байланысты жаңа деңгейге шығаруы мүмкін. Оман Сұлтаны Хайсам бен Тариқ Әл Саид Қазақстанға мемлекеттік сапармен келді, ал оның аясында жоғары деңгейдегі келіссөздер, маңызды құжаттарға қол қою және қазақ-оман бизнес-форумы жоспарланған, деп хабарлайды DKNews.kz.
5 қазанда мәртебелі мейманды Астана әуежайында Президент Қасым-Жомарт Тоқаевтың өзі қарсы алды. Ақорданың ресми мәліметінше, Оман Сұлтаны мінген борт Қазақстанның мемлекеттік шекарасынан елордаға дейін Әскери әуе күштерінің ұшақтарымен бірге ұшып келді.
Тоқаев сапарды тарихи деп атады
Мәртебелі мейманның келуіне орай әуежайдың ұшу алаңында Құрмет қарауылы ротасы мен Президент оркестрі сап түзеді.
Қарсы алу рәсімінен кейін әуежай залында екі ел басшылары аз-кем әңгімелесті.
Қасым-Жомарт Тоқаев Оман Сұлтанының мемлекеттік сапары екіжақты қарым-қатынасты дамыту тұрғысынан тарихи мәнге ие екенін атап өтті.
«Оман Сұлтандығы экономикасын ілгерілетуде зор табысқа жеткен, халықаралық аренада өте белсенді әрі конструктивті дәнекер мемлекет ретінде белгілі. Еліңіздің өз аймағында, одан тысқары жерлерде, соның ішінде Қазақстанда да беделі биік. Мемлекеттеріміз арасындағы серіктестіктің әлеуеті зор екеніне сенімдімін. Алдымызда ынтымақтастық аясын мейлінше кеңейту міндеті тұр», – деді Президент.
Хайсам бен Тариқ Әл Саид қонақжайлық танытқаны үшін Қасым-Жомарт Тоқаевқа алғыс айтып, алдағы келіссөздердің мазмұнды әрі жемісті өтетініне сенім білдірді.
Келіссөздердің артында $3 млрд инвестициялық портфель тұр
Оман Сұлтанының сапары екі ел арасындағы экономикалық байланыстар белсенді кезеңге өткен тұста өтіп жатыр.
Бұған дейін Қазақстан мен Оман жалпы құны шамамен $3 млрд болатын бес ірі инвестициялық жобадан тұратын бірлескен портфель қалыптастырған. Оның ішінде энергетика және теміржол тасымалы салаларындағы жалпы құны $1,1 млрд болатын екі жоба іске қосылған.
Ынтымақтастықтың перспективалы бағыттарына:
- энергетика;
- өнеркәсіп;
- логистика;
- денсаулық сақтау;
- тау-кен өндірісі кіреді.
«Самұрық-Қазына» мен Oman Investment Authority арасында инвестициялық ынтымақтастықтың негізгі шарттары туралы келісім де жасалған. Ол бірлескен инвестициялық платформа, жаңа кәсіпорындар мен қорлар құру секілді тетіктерді қарастырады.
Қазақстан мен Оман маңызды құжаттарға қол қояды
Мемлекеттік сапардың негізгі бөлігі жоғары деңгейдегі келіссөздер болмақ.
Ресми бағдарламада бірқатар маңызды құжатқа қол қою көзделген.
Сонымен қатар Қасым-Жомарт Тоқаев пен Хайсам бен Тариқ Әл Саид қазақ-оман бизнес-форумына қатысады.
Бұл сапардың экономикалық маңызын арттыратын негізгі факторлардың бірі. Өйткені екі елдің алдында тек жаңа келісімдер жасау емес, бұған дейін қалыптасқан инвестициялық портфельді нақты жобаларға айналдыру міндеті тұр.
Оман Қазақстан үшін жаңа логистикалық бағыт аша алады
Екіжақты қатынастардағы тағы бір маңызды бағыт — көлік және логистика.
Оманның Араб теңізіне тікелей шығатын ірі порттық инфрақұрылымы бар. Қазақстан мен Оман бұған дейін Сохар, Салала және Дукм порттарын пайдалану мүмкіндігін, сондай-ақ «Солтүстік – Оңтүстік» халықаралық көлік дәлізі аясындағы ынтымақтастықты талқылаған.
Бұл бағыт Қазақстан үшін Парсы шығанағы елдеріне, одан әрі Оңтүстік Азия мен Африка нарықтарына шығатын тасымал жолдарын әртараптандыру мүмкіндігін береді.
2026 жылы Алматы мен Маскат арасындағы әуе қатынасының қайта жандануы да екі ел арасындағы тікелей байланысты күшейтті.
Сауда көлемі де өсе бастады
Экономикалық қатынастардағы өзгерісті өзара сауда көрсеткіштері де аңғартады.
2025 жылы Қазақстан мен Оман арасындағы тауар айналымы 421,5 мың оман риалын құраса, 2026 жылдың алғашқы алты айында бұл көрсеткіш 22,88 млн риалға жеткен.
Дегенмен сауда құрылымында теңгерімсіздік сақталып отыр: айналымның басым бөлігі Оманнан Қазақстанға жеткізілетін тауарларға тиесілі.
Сондықтан қазақстандық өнімдердің Оман нарығына шығуын кеңейту екіжақты экономикалық байланыстың пайдаланылмаған мүмкіндіктерінің бірі болып қала береді.
Мемлекеттік сапардың нақты экономикалық нәтижелері енді келіссөздерден кейін белгілі болмақ. Астана мен Маскат үшін негізгі мәселе — қалыптасқан инвестициялық портфельді жаңа кәсіпорындарға, сауда ағындарына және көлік бағыттарына айналдыру.
Бұған дейін біз Оман Сұлтанының Қазақстанға сапарынан не күтуге болатынын және екі елдің шамамен $3 млрд инвестициялық портфелін егжей-тегжейлі жазған едік.
