Астана Жапония нарығына бет бұрды. Қазақстан астанасы алғаш рет Tourism EXPO Japan 2026 халықаралық туристік көрмесіне қатысып, өзін іскерлік туризм мен халықаралық іс-шаралар өткізуге қолайлы қала ретінде таныстырып жатыр, деп хабарлайды DKNews.kz.
Көрме 24–27 қыркүйек аралығында Токиодағы Tokyo Big Sight орталығында өтуде. Астана үшін басты міндет — жапон және халықаралық нарыққа елорданың MICE-туризмдегі мүмкіндіктерін көрсету.
Астана Жапонияға тек туристік бағыт ретінде шыққан жоқ
Қазақстандық делегация құрамына Астана қаласының Инвестициялар және кәсіпкерлікті дамыту басқармасы, Astana Tourism, Astana Invest, QazExpoCongress, Air Astana және отандық туроператорлардың өкілдері кірді.
Олар көрмеде қаланың қонақүй, көрме, конференциялық және көлік инфрақұрылымын таныстырып, Астанада халықаралық деңгейдегі іскерлік іс-шараларды өткізу мүмкіндігін ұсынуда.
Яғни мақсат тек турист тарту емес. Астана конференциялар, көрмелер, корпоративтік кездесулер, ынталандыру сапарлары мен ірі халықаралық форумдар өтетін алаң ретінде де алға шығып отыр.
Жапон туроператорларымен нақты келіссөздер өтті
B2B бағдарламасы аясында қазақстандық делегация бірқатар халықаралық компаниялар және ұйымдармен келіссөз жүргізді.
Олардың арасында The Telegraph-тың Токиодағы тілшісі, Club Tourism International Inc., Informa Markets Japan / WHX Osaka, TIC Travel Center Co., Ltd., Innovative Space Carrier Inc., Japan National Tourism Organization және Visit Monaco бар.
Кездесулерде Астананы халықаралық ақпараттық кеңістікте ілгерілету, Қазақстанды жапон туристеріне арналған маршруттарға енгізу, елордаға салалық іс-шаралар тарту және туризмді цифрландыру саласындағы тәжірибе алмасу мәселелері талқыланды.
«Astana Tourism командасы B2B форматындағы кездесулерді белсенді түрде өткізіп жатыр. Олар Астанаға MICE-туризмнің болашағы зор бағыты ретінде қызығушылық жоғары екенін көрсетті. Бұл көрме жаңа серіктестер, инвесторлар мен жобаларды тартуға жол ашып, елорданың Азия мен Еуропа нарықтарын байланыстыратын іскерлік іс-шаралар орталығы ретіндегі мәртебесін нығайтуға мүмкіндік беретініне сенімдіміз», — деді MICE департаментінің директоры Данияр Құрманбаев.
Жапония бағыты Қазақстан үшін маңызды болып келеді
Астананың Tourism EXPO Japan көрмесіне алғаш рет қатысуы Қазақстан мен Жапония арасындағы туристік және іскерлік байланысты кеңейтуге бағытталған жұмысқа сәйкес келеді.
Жапон нарығы Қазақстан үшін тек туристер көзі емес. Бұл — жоғары төлем қабілеті бар саяхатшылар, халықаралық компаниялар, көрме индустриясы және іскерлік туризм сегменті.
Сондықтан Астана өзін классикалық туристік бағыттан бөлек, халықаралық кездесулер мен корпоративтік іс-шаралар өткізетін қала ретінде таныстыруға тырысып отыр.
MICE-сегментінің ерекшелігі де осында: мұндай турист әдетте қалада көбірек қаржы жұмсайды, қонақүй, көлік, қоғамдық тамақтану, көрме және сервистік компаниялардың қызметін қатар пайдаланады.
Tourism EXPO Japan — Азиядағы ірі туристік алаңдардың бірі
Tourism EXPO Japan халықаралық көрмесі жыл сайын ондаған елден туристік ұйымдарды, операторларды, әуе компанияларын және салалық компанияларды жинайды.
Алаңда жаңа туристік өнімдер таныстырылып, тікелей келісімдер жасалады, халықаралық серіктестер табылады және келесі маусымдардың негізгі бағыттары талқыланады.
Көрмені Japan Travel and Tourism Association, Japan Association of Travel Agents және Japan National Tourism Organization ұйымдастырады.
Астана үшін мұндай алаңға алғаш рет шығудың мәні де осында: қала өзін жапон нарығына сырттай таныстырып қана қоймай, туроператорлармен, көрме ұйымдастырушыларымен және туристік индустрия өкілдерімен тікелей жұмыс істей бастады.
Бұған дейін біз Қазақстан мен Жапония арасындағы туристік байланысты күшейтуге мүмкіндік беретін тікелей Алматы – Токио рейсінің іске қосылуы туралы жазған едік. Енді әуе қатынасының кеңеюіне туристік нарықтағы нақты іскерлік келіссөздер қосылып отыр.
